Kibertəhlükəsizlik üzrə yeni təhsil resursu istifadəyə verilib
16.03.2022 / Maraqlı məlumatlarKibertəhlükəsizlik haqqında məlumatlılığın artırılmasını təmin etmək məqsədilə 1337.edu.az veb-səhifəsi fəaliyyətə başlayıb.
Bu barədə Təhsil Nazirliyindən məlumat verilib. Bildirilib ki, resursun yaradılmasında əsas məqsəd müxtəlif yaş qrupundan olan istifadəçilərdə kibertəhlükəsizlik, kibercinayətkarlarla mübarizə haqqında nəzəri bilik və praktik bacarıqların formalaşdırılmasıdır. Eyni zamanda, kibertəhlükəsizlik anlayışının təhsil müəssisələrində genişlənişləndirilməsi məqsədilə layihə çərçivəsində icma tədbirlərinin təşkil olunması və internetdən istifadə üçün sağlam mühitin formalaşdırılması nəzərdə tutulur.
Fərqli yaş qrupuna aid olan hər bir internet istifadəçisi 1337.edu.az veb-səhifəsində qeydiyyatdan keçərək informasiya təhlükəsizliyi sahəsində baş verən yeniliklərlə tanış ola və müxtəlif kateqoriyalar üzrə məlumatları paylaşa bilərlər.
Veb-səhifədə “Müzakirə forumu” bölməsi fəaliyyət göstərir ki, burada kibertəhlükəsizlik üzrə mütəxəssislər tərəfindən informasiya təhlükəsizliyinə aid müntəzəm olaraq bloq postlar yerləşdirilir. Bu hissədə, həmçinin “İnsidentlərin idarə olunması və cavab tədbirləri”, “Nüfuzetmə testləri” və digər mühüm məsələlər müzakirə edilir və həll yolları göstərilir.
Qeyd etmək lazımdır ki, 1337.edu.az resursu Təhsil Nazirliyinin kibertəhlükəsizlik və kibercinayətkarlarla mübarizə haqqında bilik və bacarıqların inkişaf etdirilməsinə yönəlmiş “Kibertəhlükəsizlik” təlim layihəsinin uğurlu nəticəsi olaraq yaradılıb və Təhsil sisteminin informasiyalaşdırılması idarəsi tərəfindən dəstəklənir.