DİM xarici dil üzrə qəbul və fəlsəfə doktoru imtahanlarında keçid balını toplamış iddiaçılara müraciət edib
06.04.2022 / Maraqlı məlumatlarAzərbaycan Respublikasının Prezidenti yanında Ali Attestasiya Komissiyası Rəyasət Heyətinin 2020-ci il 29 sentyabr tarixli qərarı ilə təsdiq edilmiş, 2022-ci il yanvarın 28-də isə əlavə və dəyişikliklər edilmiş qərarı 2021-ci il fevralın 14-də, iyunun 20-də, dekabrın 19-da Dövlət İmtahan Mərkəzi (DİM) tərəfindən keçirilmiş xarici dil üzrə qəbul və fəlsəfə doktoru imtahanlarında müəyyən edilən keçid balını (30 və ya daha yüksək, o cümlədən yazı bloku üzrə 2 və ya daha yüksək bal) toplamış iddiaçılara da şamil edilir.
Bu barədə Dövlət İmtahan Mərkəzindən məlumat verilib.
DİM iddiaçıların nəzərinə çatdırır ki, xarici dil üzrə fəlsəfə doktoru imtahanlarının nəticələrini özündə əks etdirən və həmin imtahanların verildiyi tarixdən dissertasiyanın ilkin müzakirəsinədək beş il müddətində etibarlı sayılan, Ali Attestasiya Komissiyasının müəyyən etdiyi formada DİM tərəfindən şəhadətnamələr hazırlanıb. İddiaçılar şəhadətnamələri götürmək üçün DİM-in Akademik Həsən Əliyev 299 ünvanında yerləşən inzibati binasına şəxsiyyəti təsdiq edən sənədlə birlikdə yaxınlaşa bilərlər.
Xarici dil üzrə qəbul imtahanında 30 və ya daha yüksək, o cümlədən yazı bloku üzrə 2 və ya daha yüksək bal toplamış iddiaçılar isə xarici dil üzrə qəbul imtahanının nəticələrinə dair “QR” kodlu elektron arayış əldə edə bilərlər. Arayışları DİM-in internet saytında yerləşdirilmiş linkdən şəxsi kabinetin istifadəçi adı (FIN) və parolunu müvafiq sahələrə daxil etməklə əldə etmək mümkündür.