Akademik Asəf Hacıyev beynəlxalq səviyyəli seminarda məruzə ilə çıxış edib

15.04.2022 / Mühüm xəbərlər

Akademik Asəf Hacıyev 13 aprel 2022-ci il tarixində Bolqarıstan Elmlər Akademiyasının  Riyaziyyat və İnformatika İnstitutunun dəvəti ilə Milli Statistika seminarında “Naməlum parametrləri artan reqressiya modellərinin araşdırılması  üçün yeni yanaşma” mövzusu ilə bağlı məruzə etmişdir. Çıxışında müvafiq sahə üzrə əldə etdiyi son nəticələri iştirakçıların diqqətinə çatdıran akademik qeyd edib ki, təklif olunan yanaşma bu günə qədər həlli mümkün olmayan praktiki məsələlərin həllinə kömək edəcək.

 Səfər çərçivəsində A.Hacıyev Bolqarıstan Elmlər Akademiyasının Prezidenti akademik Yulian Revalski ilə görüşərək riyaziyyat sahəsində müxtəlif məsələlər ətrafında fikir mübadiləsi aparmışdır. Müzakirələrdə Qara Dəniz İqtisadi Əməkdaşlıq Təşkilatına (QDİƏT) daxil olan  ölkələrin Elmlər Akademiyaları arasında əməkdaşlığın gücləndirilməsi və QDİƏT Parlament Assambleyasının 30 illiyi mübasibətilə keçiriləcək silsilə tədbirlərdə təşkilata daxil olan ölkələrin Elmlər Akademiyalarının Prezidentlərinin görüşünün keçirilməsi təklif olunmuşdur.

Sonda Bolqarıstan Elmlər Akademiyasının Prezidenti Yulian Revalski akademik A.Hacıyevə Bolqarıstan Elmlər Akademiyasının 150-ci illik yubileyinə həsr olunan xüsusi sikkəni təqdim etmişdir.