İdarəetmə Sistemləri İnstitutu Gənc Alim və Mütəxəssislər Şurasının təşkilatçılığı ilə vebinar keçirilib
19.05.2022 / Tədbirlər
AMEA İdarəetmə Sistemləri İnstitutu (İSİ) Gənc Alim və Mütəxəssislər Şurasının (GAMŞ) təşkilatçılığı ilə 14-15 may 2022-ci il tarixlərində doktorantura və dissertanturaya qəbul, həmçinin minimum imtahanları haqqında maarifləndirici vebinarlar keçirilib. Vebinarda AMEA-nın institutlarından, müxtəlif ali təhsil müəssisələrindən və digər qurumlardan olan gənc tədqiqatçılar iştirak edib.
Vebinarı giriş nitqi ilə açan İSİ GAMŞ sədri Lamiyə Nəcəfova namizədlərə doktorantura və dissertanturaya qəbul qaydaları, minimum imtahanlarının strukturu barədə ətraflı məlumat verib, iştirakçıların suallarını cavablayıb.
İki gün davam edən və 200-ə yaxın gəncin iştirak etdiyi vebinarda müxtəlif sahələri təmsil edən təlimçilər öz təcrübə və biliklərini iştirakçılarla bölüşüblər. Vebinarda iştirak edən İlahə İsgəndərova, Amid Əliyev, Nurdan Əsədova, Bəhruz Ələkbərov və Reyhan Nuhova gənclərə ingilis dili, fəlsəfə və ixtisas fənlərindən imtahanlarla bağlı geniş məlumat veriblər.
Vebinarın sonunda Lamiyə Nəcəfova qonaqlara təşəkkür edərək gələcək elmi fəaliyyətlərində müvəffəqiyyətlər arzulayıb.
