Asiyada Qarşılıqlı Fəaliyyət və Etimad tədbirləri üzrə Müşavirə təşkilatının beynəlxalq forumu öz işinə başlayıb

29.06.2022 / Mühüm xəbərlər

27 iyun 2022-ci il tarixində Qazaxıstanın paytaxtı Nur-Sultan şəhərində AQEM -Asiyada Qarşılıqlı Fəaliyyət və Etimad tədbirləri üzrə Müşavirə (CİCA - Conference on Interaction and Confidence Building Measures in Asia) təşkilatının İşçi Şurasının 5-ci Plenar sessiyası və 7-ci biznes beynəlxalq forumu öz işinə başlayıb.

AQEM-in 30 illik yubileyinə həsr olunan sessiyanın gündəliyinin əsas məsələlərindən biri də Azərbaycanın bilavasitə iştirak etdiyi Transkaspi, Şimal-Cənub, Şərq-Qərb və Zəngəzur nəqliyyat dəhlizlərinin problemlərinə həsr olunmuşdur. Sözügedən sessiyada Azərbaycan Milli Elmlər Akademiyası (AMEA) İdarəetmə sistemləri İnstitutu (İSİ), Rəqəmsal İnkişaf və Nəqliyyat Nazirliyi və SİNAM şirkətinin birgə layihə çərçivəsində hazırlanan “Nəqliyyat dəhlizlərinin səmərəlilik və təhlükəsisliyinin rəqəmsal sistemlərlə idarə olunması və elektron logistika” üzrə konsepsiyası AQEM-ə təqdim edilib.

Layihənin təqdimatını AMEA, Rəqəmsal İnkişaf və Nəqliyyat Nazirliyi və Azərbaycan Sahibkarlar Konfederasiyasının qərarı ilə Azərbaycan Sahibkarlar Konfederasiyasının Qazaxıstan üzrə rəsmi nümayəndəsi Zakir Binnətli həyata keçirib.

Qeyd edək ki, 1992 ildə yaradılan təşkilatın məqsədi Asiya regionu ölkələrinin təhlükəsizlik və stabilliyini qorumaq, qarşılıqlı münasibətlər və əməkdaşlığı inkişaf etdirməkdir.