AMEA-nın İdarəetmə Sistemləri İnstitutunda magistrantların attestasiyası keçirilib
10.07.2022 / Mühüm xəbərlər
AMEA-nın İdarəetmə Sistemləri İnstitutunda “Kompüter elmləri” və “Proseslərin avtomatlaşdırılması mühəndisliyi” ixtisasları üzrə təhsil alan I kurs magistrantların attestasiyası keçirilib.
Attestasiya Komissiyasının iclası İdarəetmə Sistemləri İnstitutunun icraçı direktoru, AMEA-nın müxbir üzvü Əminağa Sadıqovun sədrliyi ilə keçirilimişdir. O, iclası açıq elan etdikdən sonra iclas iştirakçılarını Attestasiya komissiyasının tərkibi ilə tanış etmişdir.
Sonra söz növbə ilə magistrantlara verilmişdir. Magistrantlar öz dissertasiya işlərinə dair fərdi iş planlarında nəzərdə tutulan elmi-tədqiqat işlərinin yerinə yetirilməsinin gedişatı, konfranslarda iştirak, elmi işlərin dərc olunması haqqında məlumat veriblər. Komissiyanın üzvü, İnstitutun Təhsil şöbəsinin müdiri riyaziyyat üzrə fəlsəfə doktoru Sevinc Quliyeva Komissiya üzvlərini magistrantların yay imtahan sessiyasının nəticələri ilə tanış etmişdir.
Daha sonra hər bir magistrantın gördüyü işlər ətrafında geniş müzakirələr aparılmışdır. Magistrantlar Komissiya sədrinin və üzvlərinin – elmi katib Zəhra Əzizova, texnika elmləri doktoru Asif Rzayev, dosentlər Gülçin Abdullayeva, Elxan Səbziyev və Rəşad Məstəliyevin suallarını cavablandırmış, onların tövsiyələrini dinləyiblər.
Yekunda Attestasiya Komissiyası magistrantların II semestr üzrə attestasiya olunaraq I kursu tam bitirərək II kursa keçirilmələri barədə qərar qəbul etmişdir.
