AMEA-nın bir qrup nümayəndəsi “Horizon-2020” Proqramı çərçivəsində Kiyevdə elmi ezamiyyətdə
16.03.2016 / Mühüm xəbərlər
15-16 mart 2016-cı il tarixlərində Ukrayna Təhsil və Elm Nazirliyinin təşkilatçılığı ilə Kiyev şəhərində Avropa Komissiyasının IncoNet EaP proqramı çərçivəsində enerji, iqlim dəyişiklikləri, səhiyyə və digər istiqamətlər üzrə beynəlxalq ekspertlərin iştirakı ilə "Horizon-2020” Proqramına dair Milli əlaqələdirici şəxslərin görüşü və altı sahə üzrə İşçi qrupu üçün praktiki təlim kursları keçirilib.
Konfransda AMEA Rəyasət Heyəti aparatının Beynəlxalq əlaqələr idarəsinin rəis müavini, Azərbaycanın "Horizon-2020” Proqramının milli əlaqələndiricisi Əliyeva Zərifə, Radiasiya Problemləri İnstitutunun laboratoriya müdiri, AMEA-nın müxbir üzvü Mustafayev İslam , İdarəetmə Sistemləri İnstitutunun Xarici əlaqələr və innovasiya şöbəsinin rəisi, texnika üzrə fəlsəfə doktoru Babayev Tofiq, İdarəetmə Sistemləri İnstitutunun aparıcı elmi işçisi Səbziyev Elxan,Coğrafiya İnstitutunun aparıcı elmi işçisi, coğrafiya üzrə fəlsəfə doktoru Kərimov Rövşən, Fizika İnstitutunun aparıcı elmi işçisi Cəfərov Elçin və Qafqaz Universitetinin şöbə rəisi Həsənov Zəfər iştirak ediblər.
Tədbirdə Regional və Beynəlxalq Araşdırmalar Mərkəzinin direktoru və "Horizon-2020” 7-ci Çərçivə Proqram layihəsinin elmi koordinatoru Dr. Corc Bonas, Avropa Komissiyası Tədqiqat və İnnovasiya Müdirliyinin Beynəlxalq Əməkdaşlıq üzrə məsul şəxsi Tieri Devar və digər tanınmış ekspertlər iştirak ediblər.
Tədbirdə layihələrin yazılış qaydaları bir daha təhlil olunub, müxtəlif sahələr üzrə 5 istiqamətdə - enerji, iqlim dəyişiklikləri, ətraf mühit, nəqliyyatın mühafizəsi, koordinatorların yerli əlaqələndiricilərlə işləmə qaydaları, maliyyənin layihələr üzrə paylanması və s. məsələlər ətrafında müzakirələr aparılıb. IncoNet EaP layihəsinin bu ilin avqust ayında başa çatacağı diqqətə çatdırılıb.
Parallel sessiyalarda T.Babayev və E. Səbziyev İSİ-nin və Azərbaycanın yeni innovativ layihələri barədə məlumat vermişlər, həmçinin HORİZON 2020 iş programı çərçivəsində konsorsium yaradilması barədə danışıqlar aparmışdılar.
Təşkilatçıların sözügedən layihənin davamı olaraq cari ilin iyun ayında yeni proqram üzrə işlərin aparılması barədə qərarı açıqlanıb.
