Dövlət qulluğunda fəaliyyətin davam etdirilməsi üzrə imtahanın nəticələri açıqlanıb
13.09.2022 / Maraqlı məlumatlarDövlət qulluğunda fəaliyyətin davam etdirilməsi (BB altqrupu) üzrə sentyabrın 11-də keçirilmiş imtahanın nəticələri açıqlanıb.
Bu barədə Dövlət İmtahan Mərkəzindən məlumat verilib. Namizədlər imtahanın nəticələri ilə DİM-in səhifəsində tanış ola bilərlər. İmtahanın nəticələri haqqında məlumatı mobil operatorlar (Azercell, Bakcell, Nar, Naxtel) vasitəsilə “iş nömrəsi”ni 7727 nömrəsinə göndərməklə də öyrənmək olar.
Dövlət qulluğunda fəaliyyətin davam etdirilməsi imtahanında 209 namizəd iştirak edib. İmtahan nəticələrinə əsasən, BB1 altqrupu üzrə 31 nəfər, BB2 altqrupu üzrə 61 nəfər, BB3 altqrupu üzrə 46 nəfər, BB4 altqrupu üzrə 36 nəfər olmaqla, ümumilikdə 174 namizəd tələb olunan müsabiqə şərtlərini ödəyərək uğur qazanıb.
Test imtahanından müvəffəqiyyətlə keçən namizədlərə altqruplara daxil olan vəzifələrə uyğun olaraq sertifikat veriləcək. Sertifikat 5 il qüvvədə olur.
İmtahanın nəticələri ilə bağlı Apellyasiya komissiyası sentyabrın 13-15-də saat 14:00-dan 17:00-dək Dövlət İmtahan Mərkəzində fəaliyyət göstərəcək. Ünvan: Bakı şəhəri, Nəsimi rayonu, Akademik Həsən Əliyev küçəsi, 299.