İdarəetmə Sistemləri İnstitutunun əməkdaşları və dissertantları beynəlxalq elmi konfransda iştirak ediblər
20.09.2022 / Mühüm xəbərlərİdarəetmə Sistemləri İnstitutunun Mürəkkəb dinаmik sistemlərdə idаrəetmə üsulları laboratoriyasının əməkdaşları və institutun fəlsəfə və elmlər doktoru hazırlığı üzrə dissertantları 19-22 sentyabr 2022-ci il tarixlərində Rusiyanın İrkutsk şəhərində keçirilən IV Beynəlxalq “Dinamik sistemlər və kompüter elmləri: nəzəriyə və tətbiqləri” elmi konfransında iştirak ediblər.
Konfransda Mürəkkəb dinаmik sistemlərdə idаrəetmə üsulları laboratoriyasının müdiri, r.e.d., prof. Kamil Mənsimov məruzə ilə çıxış etmişdir. Sonra laboratoriyanın aparıcı elmi işçisi, dos., Rəşad Məstəliyev Kamil Mənsimovla həmmüəllif olduqları “Stoxastik Qursa–Darbu sistemlərində klassik mənada məxsusi idarələrin optimallığı üçün çoxnöqtəli zəruri şərtlər” mövzusunda məruzə etmişdir. Məruzələr konfrans iştirakçılarının marağına səbəb olmuş, müxtəlif suallar səsləndirilmiş və müzakirələr aparılmışdır.
Qeyd edək ki, İrkutsk Dövlət Universitetinin Riyaziyyat və İnformasiya Texnologiyaları İnstitutunun təşkilatçılığı ilə keçirilən konfransın proqramına laboratoriyanın 5 seksiya məruzəsi daxil edilmişdir.