DİM dövlət qulluğunda inzibati rəhbər vəzifələr üzrə test imtahanına qeydiyyat elan edib
13.10.2022 / Maraqlı məlumatlar
Dövlət İmtahan Mərkəzi (DİM) noyabrın 13-də inzibati dövlət qulluğu vəzifələrinin A növünə (inzibati rəhbər vəzifələr) aid olan AB və AC qruplarına uyğun vəzifələr üzrə test imtahanı keçirəcək. İmtahana qeydiyyat noyabrın 10-dək aparılacaq.
Bu barədə DİM-dən məlumat verilib. Bildirilib ki, Bakı şəhəri, Nəsimi rayonu, Ə.Salamzadə küçəsi, 28 ünvanında təşkil ediləcək imtahan kompüter vasitəsilə keçiriləcək.
İmtahanda iştirak etmək istəyən namizədin DİM-in portalında “Şəxsi kabinet”i olmalıdır. Kabinet yaradılan zaman pul hesabı açılır. İmtahanlarda iştirak üçün ödəniş tarifləri və üsulları DİM-in saytında yerləşdirilib. “Şəxsi kabinet” yaradıldıqdan və hesaba lazımi vəsait daxil edildikdən sonra imtahanlarda iştirak etmək üçün qeydiyyatdan keçmək lazımdır. Qeydiyyatdan keçən və imtahanda iştirak etməyən namizədlərin ödədiyi məbləğ geri qaytarılmır.
