DİM Elm və Təhsil Nazirliyində vakant məsləhətçi vəzifəsi üzrə qeydiyyatdan keçən namizədlərə müraciət edib
01.12.2022 / Maraqlı məlumatlarDövlət İmtahan Mərkəzi (DİM) dövlət qulluğuna qəbul üçün müsabiqə üzrə 2022-ci il 6 sentyabr tarixli müsahibə elanında Elm və Təhsil Nazirliyinin Təhsilin inkişafı proqramları şöbəsinin Layihələr ilə iş sektorunda vakant məsləhətçi vəzifəsi üzrə qeydiyyatdan keçmiş namizədlərin nəzərinə çatdırır ki, DİM-ə noyabrın 28-də daxil olmuş Elm və Təhsil Nazirliyinin 2022-ci il 25 noyabr tarixli №05-9-2460/16 nömrəli məktubunda nazirliyin Aparatının və strukturuna daxil olan qurumların işçilərinin ümumi say həddi, habelə nazirliyin strukturuna daxil olmayan tabeliyindəki qurumların siyahısı və yeni yaradılan agentliklərin strukturu və işçilərinin say həddi ilə bağlı təkliflər hazırlandığı bildirilib.
DİM-dən bildirilib ki, Elm və Təhsil Nazirliyinin qeyd edilən məktubu nəzərə alınaraq sentyabrın 6-da elan edilmiş dövlət qulluğuna qəbul üçün müsabiqə üzrə müsahibə elanında nazirliyin Təhsilin inkişafı və proqramları şöbəsinin Layihələr ilə iş sektorunda vakant məsləhətçi vəzifəsi üzrə 21 dekabr 2022-ci il – 6 yanvar 2023-cü il tarixlərinə təyin edilmiş müsahibələr ləğv edilib.
Qanunvericiliyin tələbinə əsasən, dövlət qulluğuna qəbul üçün test imtahanından keçdiyini təsdiq edən sertifikatı olan şəxs həmin sertifikatın qüvvədə olma müddətinin hər ili ərzində beş müsahibədə iştirak etmək üçün ödənişsiz müraciət edə bilər. Beşdən artıq müsahibədə iştirak isə ödənişlidir.
Müsahibələrin ləğv edilməsi namizədlərin ödənişsiz iştirak etmək hüququna malik olduğu müsahibə sayı hesablanarkən nəzərə alınacaq, habelə müsahibədə iştirak etmək üçün namizədlər tərəfindən ödənilmiş məbləğ geri qaytarılacaq.