AMEA-nın vitse-prezidenti, akademik Nərgiz Paşayevanın 60 yaşı tamam olur
13.12.2022 / Mühüm xəbərlər
Bu gün görkəmli ədəbiyyatşünas alim, Əməkdar elm xadimi, “Azərbaycan Respublikasının Nizami Gəncəvi adına Qızıl medalı” laureatı, “Şöhrət” və “Şərəf” ordenli, Oksford Universiteti nəzdində Nizami Gəncəvi adına Azərbaycan və Qafqazşünaslıq Mərkəzinin yaradılmasının təşəbbüskarı, AMEA-nın vitse-prezidenti, M.V.Lomonosov adına Moskva Dövlət Universitetinin Bakı filialının rektoru, akademik Nərgiz Paşayevanın 60 illik yubileyidir.
Akademik Nərgiz Arif qızı Paşayeva Bakı Dövlət Universitetinin Filologiya fakültəsini fərqlənmə diplomu ilə bitirmiş, 1987-ci ildə “Sabirin novatorluğu” mövzusunda namizədlik, 2005-ci ildə “Müasir Azərbaycan ədəbiyyatında insanın bədii-estetik dərki (Xalq yazıçısı Elçinin yaradıcılığı əsasında)” mövzusunda doktorluq dissertasiyalarını müdafiə etmiş, 2005-ci ildə professor elmi adını almışdır. 2014-cü ildə AMEA-nın müxbir üzvü, 2017-ci ildə həqiqi üzvü seçilmişdir. 2019-cu ildən Rusiya Təhsil Akademiyasının həqiqi üzvüdür. 2019-cu ildə AMEA-nın vitse-prezidenti seçilmişdir.
Tanınmış ədəbiyyatşünas alim əmək fəaliyyətinə Bakı Dövlət Universitetinin Azərbaycan ədəbiyyatı tarixi kafedrasında başlayaraq assistent, müəllim, baş müəllim, dosent vəzifələrində çalışmış (1987-ci ildən), Bakı Musiqi Akademiyasının Dil və ədəbiyyat kafedrasının müdiri (1994-2008), Bakı Dövlət Universitetinin Beynəlxalq əlaqələr üzrə prorektoru olmuşdur (2006-2008). M.V.Lomonosov adına Moskva Dövlət Universitetinin Bakı filialının rektoru (2008-ci ildən), Bakı Dövlət Universitetinin Klassik Azərbaycan ədəbiyyatı kafedrasının müdiridir (2009-cu ildən).
Oksford Universiteti nəzdində Nizami Gəncəvi adına Azərbaycan və Qafqazşünaslıq Mərkəzinin yaradılmasının təşəbbüskarı (2013), Mərkəzin İdarə Heyətinin üzvü (2018), Böyük Britaniyada təsis edilmiş Azərbaycanı və Qafqazı öyrənən Britaniya Fondunun qəyyumluq şurasının sədridir (2016). Oksford Universitetinin Kansleri Lord Patten Barnesin rəhbərlik etdiyi Xeyriyyəçilik Komitəsinin daimi üzvüdür (2018).
Alimin rəhbərliyi ilə Oksford Universitetinin Nizami Gəncəvi adına Azərbaycan və Qafqazşünaslıq Elmi Mərkəzinin hazırladığı proqram çərçivəsində Bərdə şəhərində arxeoloji qazıntı işləri aparılmış (2014-2019), Britaniyada Azərbaycanın orta əsrlər tarixi ilə bağlı bir sıra elmi-akademik seminar və müxtəlif layihələr həyata keçirilmişdir. Onun təşəbbüsü ilə Oksford Universiteti nəzdində Nizami Gəncəvi adına Azərbaycan və Qafqazşünaslıq Mərkəzinin layihəsi çərçivəsində şərqşünas-alim Yevgeni Bertelsin “Böyük Azərbaycan şairi Nizami” kitabı ilk dəfə ingilis dilinə tərcümə olunaraq çap edilmişdir. Nərgiz Paşayevanın müəllifi olduğu layihələr əsasında “Molla Nəsrəddin” jurnalı yenidən çap olunmuş, “Azərbaycan xalq çalğı alətləri” kataloqu hazırlanmış, “Səməd Vurğunun həyatı məktublarda” və digər kitablar işıq üzü görmüşdür. “Sabirin novatorluğu”, “İnsan bədii tədqiqat obyekti kimi”, “İnsan – obraz - ədəbiyyat”, “Yeniləşən ədəbiyyatın yeni insanı” monoqrafiyalarının, ali məktəblər üçün “Antik ədəbiyyat tarixi” (I-II) dərsliyinin müəllifidir. “İntizar” operasına libretto yazmış və yeni quruluşda təqdim olunmasına nail olmuşdur.
Akademik Nərgiz Paşayeva “Üns” bədii yaradıcılıq səhnəsinin yaradıcısı və bədii rəhbəri (2006-cı ildən), Azərbaycan Yazıçılar Birliyinin üzvü (2007) və “İngiltərə-Azərbaycan xeyriyyə Cəmiyyəti”nin həmsədridir (2007).
Rusiya Federasiyası Xarici İşlər Nazirliyinin “Dostluqda göstərdiyi xidmətlərə görə” nişanına (2008), “Əməkdar elm xadimi” fəxri adına (2009), Rusiya Federasiyasının ali dövlət mükafatı olan “Dostluq” ordeninə, UNESCO-nun “Mədəniyyətlərin müxtəlifliyinə görə” medalına (2008), Macarıstanın dövlət mükafatı olan “Xidmətlərə görə” Komandor Xaç ordeninə, Fransanın zabit dərəcəli “Akademik Palma” fransız ordeninə (2013), “Azərbaycan Respublikasının Nizami Gəncəvi adına Qızıl medalı”na (2017), “Şöhrət” (2019), “Şərəf” (2022) ordenlərinə layiq görülmüşdür.
Azərbaycan ədəbiyyatşünaslıq elminin və təhsilinin inkişafında mühüm xidmətləri olan akademik Nərgiz Paşayevanı 60 illik yubileyi münasibətilə təbrik edir, ona möhkəm cansağlığı, uzun ömür, elmi və elmi-təşkilati fəaliyyətində daha böyük uğurlar arzulayırıq.
