AMEA İdarəetmə Sistemləri İnstitutunun əməkdaşı Almaniyada tərs məsələlər üzrə Beynəlxalq simpoziumda iştirak etmişdir.
23.09.2016 / Xəbərlər
22-23 sentyabr 2016-cı il tarixlərində Almaniyanın Kemnitz şəhərində "Tərs məsələlər” üzrə Beynəlxalq simpozium keçirilib. Beynəlxalq simpoziumda AMEA İdarəetmə Sistemləri İnstitutunun aparıcı elmi işçisi, riyaziyyat üzrə fəlsəfə doktoru, dosent Rəhimov Anar iştirak edib.
Simpozium Almaniyadan və Tərs məsələlər üzrə beynəlxalq cəmiyyətdən olan ekspertləri və gənc alimləri bir araya gətirmişdir. Simpozium təbiət elmləri, mühəndislik və maliyyə sahəsində qarşıya çıxan tətbiqi tərs məsələlərin analitik, ədədi, stoxastik həllinə, eləcə də pis şərtlənmə, requlyarlaşdırma nəzəriyyəsinə və praktikasına fokuslanmışdır.
Rəhimov A. simpoziumda "Qeyri-lokal şərtlərlə verilmiş parabolik tənlik üçün tərs məsələlərin ədədi həlli” (Numerical solution to inverse problems for parabolic equation with nonlocal conditions) mövzusunda məruzə ilə çıxış etmişdir. Məruzə simpozium iştirakçılarının marağına səbəb olmuş, mövzu ərafında müxtəlif suallar verilmişdir.
Simpoziumda dünyada tanınmış alimlərdən olan Masahiro Yamamoto (Yaponiya), Volker Mişel, Bernd Hofman, Ester Klan (Almaniya), Lothar Reiçel (ABŞ), Banqti Cin (Böyük Britaniya), Sergey Pereverzyev (Avstriya) və başqaları maraqlı məruzələrlə çıxış ediblər.
Qeyd edək ki, Rəhimov A. hal-hazırda "AMEA-nın gənc alim və mütəxəssislərinin Avropanın elm mərkəzlərində doktorantura təhsili və elmi-tədqiqat işləri aparması” proqramı çərçivəsində Fransanın Marsel şəhərində Eks-Marsel Universiteti və Fransa Milli Elmi Tədqiqatlar Mərkəzinin (CNRS) nəzdindəki Frenel Elmi-Tədqiqat İnstitutunda (www.fresnel.fr/spip/spip.php?article1471) tərs məsələlərin ədədi həlli istiqamətində elmi-tədqiqat işləri aparır.
