Şifrələri bir dəqiqəyə təyin edə bilən neyron şəbəkəsi yaradılıb
12.04.2023 / Maraqlı məlumatlar
Bir çox digər texnologiyalar kimi süni zəkanın da qaranlıq tərəfi var. Məsələn şifrələrin təxmin edilməsi üçün nəzərdə tutulmuş PassGAN adlı neyron şəbəkəsi şifrələrin 51%-ni 1 dəqiqə ərzində düzgün şəkildə təyin edə bilir. Şifrələrin 71%-nin düzgün təyin edilməsi üçün isə neyron şəbəkəsinə cəmi 1 gün vaxt lazımdır. Kibertəhlükəsizlik sahəsində fəaliyyət göstərən Home Security Heroes şirkətinin tədqiqatı məhz bu cür nəticələr verib.
PassGAN adlı neyron şəbəkəsi 15 milyon ədəd şifrəni özündə birləşdirən məlumatlar bazası əsasında təlimatlandırılıb. Neyron şəbəkə öz unikal çalışma mexanizmi sayəsində şifrələrin 51%-ni 1 dəqiqə ərzində, 65%-ni 1 saat ərzində, 71%-ni 1 gün ərzində, 81%-ni isə 4 həftə ərzində hack edə bilir. PassGAN-ın əsas fərqləndirici özəlliyi ondan ibarətdir ki, o, real şifrələrin real məlumat sızıntılarında paylanmasını avtomatik şəkildə analiz edir. Bu cür neyron şəbəkənin kiberhücumundan qorunmaq mümkündür.
Sadəcə olaraq əsas təhlükəsizlik tədbirlərini yerinə yetirmək lazımdır. Belə ki, istifadəçi bu və ya digər hesabı üçün şifrə tərtib edən zaman tərtib edilən şifrə minimum 12 simvoldan, böyük və kiçik hərflərdən, rəqəmlərdən və xüsusi simvollardan (@, -, ? və s.) ibarət olmalıdır. Xüsusi simvolların bütün növlərinə sahib 18 simvollu şifrə süni zəka tərəfindən təyin edilə biliməyən şifrə kimi qiymətləndirilir. Bu cür şifrənin təyin edilməsi üçün müasir sistemə 6 kvadrilyon il vaxt lazım olar.
