Xərçəng hüceyrələrini yox etməyin yeni üsulu tapılıb
17.04.2023 / Maraqlı məlumatlarRusiyalı alimlər gümüş nanohissəciklərdən istifadə etməklə xərçəng hüceyrələrini yox etməyin yeni üsulunu hazırlayıblar. Bu barədə Tomsk Politexnik İnstitutunun mətbuat xidməti məlumat yayıb. Bildirilir ki, gümüş nanohissəciklərin istifadəsi asan yolla əldə olunduğuna görə kifayət qədər geniş yayılmışdır. Son illərdə onlar tibbdə olduqca çox istifadə olunur. Alimlər ölçüləri 100 nanometrdən kiçik hissəciklər əldə ediblər. Araşdırmalar göstərib ki, bu nanohissəciklər bir sıra bioloji xüsusiyyətlərə malikdir.
Onların xərçəngə səbəb olan hüceyrələrin ölümünə səbəb olduğu aşkar edilib. Alimlər bunu sınaqlarla sübut ediblər. Tiroid, kolon, neyroblastoma və döş xərçəngi hüceyrələri üzərində sınaqdan keçirilib. Məlum olub ki, nanohissəciklər suda sabitdir və orqanizmdə uzun müddət yaşaya bilir. Alimlər müəyyən ediblər ki, gümüş nanohissəciklər, belə demək mümkünsə, xərçəng yaradan hüceyrələrə hücum edir, lakin insan sağlamlığına zərər vermir. Müəlliflər tədqiqatlarının nəticələrinin xərçənglə mübarizədə kömək edəcəyinə inanırlar.