AMEA İdarəetmə Sistemləri İnstitutu Gənc Alim və Mütəxəssislər Şurasının növbəti iclası keçirildi
18.10.2017 / Xəbərlər
18 oktyabr 2017-ci ildə AMEA İdarəetmə Sistemləri İnstitutu Gənc Alim və Mütəxəssislər Şurasının növbəti iclası keçirildi. İclasda bir sıra məsələlər müzakirə olundu və gənclərə müəyyən tövsiyələr verildi.
Şura sədri r.ü.f.d., dosent Rəşad Məstəliyev öz çıxışında Azərbaycan Milli Elmlər Akademiyası, Azərbaycan Respublikasının Təhsil Nazirliyi, Gənclər və İdman Nazirliyinin birgə təşkilatçılığı 15 dekabr 2017-ci il tarixində Azərbaycan Gənc Alimlərinin I Qurultayının keçiriləcəyi barədə iştirakçılara məlumat verdi. Bundan başqa sədr çıxışında bildirdi ki, gənc alim, elmi işçi, doktorant, magistr və bakalavrlar, həmçinin gənc tədqiqatçılar "Gənc tədqiqatçı" jurnalının növbəti sayı üçün öz məqalələrini təqdim edə bilərlər. R.Məstəliyev çıxışında gənc alim və mütəxəssislərə orta məktəblərdə yaradılacaq institut stendinə kitablar verməyi, şagirdlərin elmə marağının artırılmasında aktiv olmalarını tövsiyə etdi.
İclasda instituta 2017-ci ildə qəbul olmuş magistrantlar və yeni işçilər Gənc Alim və Mütəxəssislər şurasına üzv qəbul olundular. İSİ Gənc Alim və Mütəxəssislər şurasının sədr müavini, www.isi.az saytının baş redaktoru elmi işçi Aygün Əliyeva gənclərə öz tövsiyələrini verib onlara bu işdə uğurlar arzu etdi. İclas əsnasında İnstitutun işçisi və 2-ci kurs magistrantı Nəcəfova Lamiyə şuraya 2-ci müavin təyin edildi.
Sonda r.ü.f.d., dosent Yeganə Əşrəfova «Web of Siences platforması və bazasında axtarış» haqqında geniş məruzə ilə çıxış etdi və məruzəyə aid yaranan sualları ətraflı cavablandırdı.
