Youtube reklam bloklayıcılarından istifadə edənlər üçün video izləmə imkanını deaktiv etməyə başlayıb
11.05.2023 / Maraqlı məlumatlar
İstifadəçilər artıq uzun müddətdir ki, brauzerlər üçün nəzərdə tutulmuş əlavələr vasitəsilə videolardakı reklam elanları ilə mübarizə aparırlar. Lakin görünür, Youtube servisini bu cür vəziyyət heç də qane etmir. Reddit istifadəçilərindən birinin verdiyi məlumata əsasən videoservis onun üçün kontent izləmə imkanını bloklayıb. Belə ki, istifadəçi reklam bloklayıcısından istifadə edirmiş. Google təmsilçiləri artıq təsdiqləyiblər ki, söhbət, hansısa texniki problemdən getmir. Sözügedən hal ilə qarşılaşmış Reddit istifadəçisi ona Youtube tərəfindən təqdim edilmiş bildirişin screenshot fotosunu paylaşıb.
Həmin fotoda “Youtube-da reklam bloklayıcıları qadağandır” cümləsi əks olunub. Bununla yanaşı bildirişdə qeyd edilib ki, reklam elanları sayəsində Youtube milyardlarla insan üçün pulsuz şəkildə fəaliyyət göstərir. Reklam elanlarından qurtulmaq üçün istifadəçiyə Youtube Premium abunəliyini əldə etmək təklifi edilib. Youtube təmsilçiləri bildiriblər ki, sözügedən bildiriş hal hazırda şirkət tərəfindən aparılan bir təcrübədir. Həmin təcrübədə videoservisin məhdud sayda istifadəçisi iştirak edir. Buna görə də sözügedən bildiriş hələ hamıda əks olunmur. Youtube təmsilçiləri bu praktikanın daha iri miqyasda genişlənib-genişlənməyəcəyi barəsində heç bir məlumat verməyiblər.
