Google yaxın aylar ərzində Find My Device servisinin yenilənmiş versiyasını istifadəyə verəcək
12.05.2023 / Maraqlı məlumatlar
Google şirkətinin Find My Device adlı servisi yaxın zamanda böyük yenilənmə əldə edəcək. Təqdim ediləcək yenilənmə çərçivəsində sözügedən servis təkcə smartfonların deyil, həmçinin digər cihazların da yerləşdikləri yerləri əks etdirəcək. Servisdə reallaşdırılacaq əsas yenilik tamamilə yeni axtarış sistemi olacaq. Belə ki, axtarış sistemində dünyadakı Android smartfonların əksəriyyəti iştirak edəcək. Hal hazırda Find My Device servisi itmiş smartfonu GPS və internet bağlantısı vasitəsilə xəritədə əks etdirə bilir.
Bir neçə aydan sonra istifadəyə veriləcək yenilənmiş servis təkcə smartfonları deyil, həmçinin qulaqlıqları, planşetləri və digər cihazları də tapmağa imkan verəcək. Bu barədə məlumat Google I/O 2023 konfransı çərçivəsində verilib. İtmiş cihaz öz yerləşdiyi yer barəsində məlumatları internet bağlantısı vasitəsilə digər smartfonlara ötürəcək. Məsələn Samsung şirkətinin Galaxy SmartTag trekeri bu prinsip vasitəsilə çalışır. Treker internetə qoşulmasa da, onun yaxınlığında olan Galaxy smartfonları onun siqnalını qəbul edə və Samsung serverlərinə ötürə bilirlər. Find My Device servisində bu yeni funksiyanın dəqiq şəkildə nə zaman istifadəyə veriləcəyi bilinmir.
