Alimlər ən parlaq və davamedici kosmik işartını aşkar ediblər
15.05.2023 / Maraqlı məlumatlar
Böyük Britaniyanın Sauthempton Universitetinin astronomları ən güclü və uzun müddət ərzində davam edən kosmik işartını aşkar ediblər. Aşkar edilmiş kosmik işartı bilinən bütün supernova partlayışlarından 10 dəfə daha parlaqdır. Yeni təyin edilmiş kosmik işartı hadisəsi AT2021lwx adını əldə edib. Bu hadisə artıq 3 ildən çoxdur ki, davam edir. Müqayisə üçün qeyd etmək lazımdır ki, supernova partlayışları nəticəsində əmələ gələn işartı yalnız bir neçə ay ərzində müşahidə edilir.
Aşkar edilmiş ən parlaq və davamedici işartı Yer kürəsindən 8 milyard işıq ili uzaqlığında yerləşir. Yəni kainatın həmin vaxtda 6 milyard il yaşı var idi. Alimlərin fikirlərinə əsasən sözügedən işartıya səbəb olmuş partlayışın mənbəyi yüksək kütləli qara dəlik tərəfindən udulan qaz bulududur. Güman edilir ki, udulan qaz buludu Günəşdən bir neçə min dəfə böyükdür. Bu cür obyekt qara dəliyə daxil olan zaman qara dəliyin akkresiya diskindən zərbə dalğaları keçir. Bu cür hadisələr çox nadir hallarda baş verir.
