Jeff Bezos-un Blue Origin şirkəti astronavtların Aya eniş etmələrindən cavabdeh olacaq
23.05.2023 / Maraqlı məlumatlar
NASA astronavtları Aya çatdıracaq ikinci şirkəti seçib. “Artemis” Ay proqramı çərçivəsində üçüncü missiya zamanı astronavtların Aya eniş etmələrindən Jeff Bezos-un Blue Origin şirkəti cavabdeh olacaq. Sözügedən şirkət “Artemis V” missiyası üçün nəzərdə tutulmuş eniş sistemini inşa edəcək. Qeyd etmək lazımdır ki, “Artemis V” missiyasının 2029-cu ildə reallaşdırılması planlaşdırılır. Artıq məlumdur ki, Blue Origin şirkəti Blue Moon adlı eniş aparatı üzərində çalışır. NASA-nın Orion adlı kosmik kapsulu 4 nəfər astronavtı Ayın orbitində yerləşəcək Gateway adlı kosmik stansiyaya çatdıracaq.
Daha sonra 2 nəfər astronavt Blue Origin-in eniş aparatından istifadə edərək Ayın cənub qütbünə eniş edəcəklər. Missiya 1 həftə ərzində davam edəcək və bu müddət ərzində astronavtlar Ay səthində hərəkət etmək üçün nəzərdə tutulmuş nəqliyyat vasitəsindən istifadə edəcəklər və müxtəlif təcrübələr aparacaqlar. Gateway-də qalacaq digər iki nəfər astronavt isə Ay stansiyasında xidmət göstərəcəklər. NASA artıq qərarlaşdırıb ki, astronavtların Aya eniş edəcəkləri “Artemis III” və “Artemis IV” missiyalarında SpaceX-in kosmik gəmisindən istifadə ediləcək.
