Windows 11-in kompüterə təkrar quraşdırılması prosesi sadələşdiriləcək
17.07.2023 / Maraqlı məlumatlarWindows-un kompüterə təkrar quraşdırılması əməliyyat sistemindəki software səviyyəsində olan bu və ya digər ciddi problemin aradan qaldırılması üçün nəzərdə tutulmuş universal həll yoludur. Lakin istifadəçilərin əksəriyyəti bu üsulu sevmir. Bunun əsas səbəbi isə ondadır ki, Windows-un təkrar quraşdırılmasından sonra istifadəçi əməliyyat sistemində istifadə edilən tətbiqləri və ayarları yenidən bərpa etməli olur. Yaxşı xəbər ondan ibarətdir ki, Microsoft Windows 11-in bərpa edilməsi prosesini sadələşdirəcək.
Belə ki, şirkət bunu Windows-un yenilənmələr mərkəzi vasitəsilə reallaşdırılmasını mümkün edəcək. Windows 11-in 25905 nömrəli beta versiyasında yeni funksiya ortaya çıxıb. Microsoft yeni funksiyanı hələ rəmi şəkildə anons etməyib. Söhbət, Windows-un yenilənmələr mərkəzi vasitəsilə əməliyyat sisteminin bərpa edilməsi imkanından gedir. Bu yeni funksiyadan Windows 11-in beta versiyasının bütün istifadəçiləri yararlana bilərlər.
Bu isə o deməkdir ki, o, hamı tərəfindən test olunmağa artıq hazırdır. Windows-un yenilənmələr mərkəzi vasitəsdilə əməliyyat sisteminin bərpası çərçivəsində Windows 11-in ən son versiyası yüklənir və kompüterdə mövcud olan versiyanın üzərinə quraşdırılır. Bu halda kompüterdə olan tətbiqlər, ayarlar, məlumatlar və s. silinmirlər. Bu yeni funksiyanın stabil Windows 11 versiyasında nə zaman istifadəyə veriləcəyi bilinmir.