“Gənc alimlərin innovativ ideya” düşərgəsi təşkil olunub

13.07.2023 / Mühüm xəbərlər

26 iyun-1 iyul tarixlərində Şəki şəhərində Azərbaycan Respublikası Gənclər və İdman Nazirliyi və Azərbaycan Milli Elmlər Akademiyasının Gənc Alim və Mütəxəssislər Şurasının təşkilatçılığı ilə “Gənc alimlərin innovativ ideya” düşərgəsi təşkil olunub. Düşərgədə İdarəetmə Sistemləri İnstitutunun (İSİ) əməkdaşları o cümlədən, Gənc Alim və Mütəxəssislər Şurasının sədri Lamiyə Nəcəfova, şura üzvləri Səyyarə Hidayətzadə, Nigar Əhmədli, Elnur Qasımov, Əli Qurbanov və Atakişi Göyüşov iştirak ediblər.

Düşərgənin açılış mərasimində AMEA-nın prezidenti, akademik İsa Həbibbəyli gənclərə gələcək işlərində uğurlar arzu edib. Açılış mərasimində Lamiyə Nəcəfova da çıxış edərək institutda aparılan innovativ layihələrdən bəhs edib və düşərəgənin təşkili üçün minnətdarlığını bildirib.

Düşərgə çərçivəsində İSİ-nin əməkdaşları Lamiyə Nəcəfova və Səyyarə Hidayətzadə müxtəlif mövzularda təlimlər keçirib, mövzular ətrafında geniş müzakirələr aparılıb. Gənc tədqiqatçılar eyni zamanda, digər təlim və seminarlarda da iştirak ediblər.

Düşərgədə gənc alimlər asudə vaxtlarını səmərəli keçirmək məqsədilə müxtəlif idman və intellektual yarışlara qoşulmuş, həmçinin yeni innovativ layihələr düşünərək onları təqdim etmişlər. İştiakçılar qarşılıqlı bilik mübadiləsi aparmaları üçün göstərilən dəstəyə görə Azərbaycan Respublikası Gənclər və İdman Nazirliyi və Azərbaycan Milli Elmlər Akademiyasının Gənc Alim və Mütəxəssislər Şurasına minnətdarlıqlarını bildiriblər.