İstifadəçilər Windows 11-də yeni problemlərlə qarşılaşıblar
28.07.2023 / Maraqlı məlumatlar
Bir neçə gün bundan öncə Windows 11 22H2 üçün KB5028254 nömrəli yenilənmə istifadəyə verildi. Bu yenilənmənin istifadəyə verilməsindən sonra bəzi istifadəçilər əməliyyat sistemi daxilində müəyyən problemlərdən şikayətlənməyə başladılar. Onların arasında həmçinin əməliyyat sisteminin Start menyusunda nasazlıqlar yaşayan istifadəçilər də var idi. Microsoft isə öz növbəsində yaranmış problemdən xəbərdardır və onun fikrincə onun bu mövzuda günahı yoxdur. Nəticədə şirkət problemi həll etmək niyyətində deyil.
İstifadəçilərin şikayətlərini analiz edəndən sonra Microsoft belə qənatə gəlib ki, Start menyusu ilə yaranmış problem Windows 11-də spesifik kənar proqram təminatından istifadə etmiş şəxsləri əhatə edib. Söhbət, əsasən ExplorerPatch adlı tətbiqdən gedir. Bu tətbiq Windows 10-nun bəzi funksiyalarını Windows 11-ə əlavə etməyə imkan verir. Bura həmçinin köhnə Start menyusu da daxildir. Bu problem əməliyyat sisteminin dəstəklənməyən ayarlama üsullarından istifadəni əhatə etdiyi üçün Microsoft hansısa dəyişikliyi etməyəcəyini bildirib. Şirkət KB5028254 nömrəli yenilənmənin yüklənməsindən öncə kənar tətbiqlərin silinməsini və ya əməliyyat sistemində problem yaradan tətbiqin tərtibatçılarına müraciət etməyi məsləhət görüb.
