İdarəetmə Sistemləri İnstitutunun əməkdaşı beynəlxalq konqresdə iştirak edib
29.08.2023 / Mühüm xəbərlərAR Elm və Təhsil Nazirliyi İdarəetmə Sistemləri İnstitutunun Süni intellekt metodlarının tətbiqi və tanınma məsələlərinin tədqiqi laboratoriyasının aparıcı elmi işçisi, professor Şahnaz Şahbazova 20-23 Avqust tarixlərində Cənubi Koreyanın Tequ şəhərində keçirilən Beynəlxalq Fuzzy Sistemləri Cəmiyyətinin 20-ci Dünya Konqresində (IFSA2023) dəvət olunmuş məruzəçi kimi iki məqalə ilə çıxış edib.
Alimin “Lütfi A. Zadənin bioqrafiyası və elmi irsi: Soft computing, Sistem nəzəriyyəsi, Qərar və nəzarət” və “Vizual və audio informasiyaların hesablamalarının optimallığı üçün intellektual üsulun yaradılması” adlı məqalələrində professor Lütfi-Zadənin həyatı və elmi irsi təsvir edilmiş, Bakıda keçirdiyi uşaqlıq illəri, həyatı və elmi işlərinin ilkin nəticələri, eləcə də elmi kəşflərindən bəhs edilmişdir. Lütfi-Zadənin digər alimlərlə (müəllimi Norbert Viner, Rudolf Kalman, Charles A.Desoer və başqaları) əməkdaşlığı və həyatın son mərhələsinə qədər olan elmi fəaliyyəti barədə ətraflı məlumat verilmiş, ölümündən sonrakı 5 il ərzində onun davamçılarının elmi fəaliyyəti haqında məlumatlar təqdim olunmuşdur. Həmçinin təbii mühitdə vizual və audio informasiyaların tanınması problemini həll etməyə qadir olan ən sabit həllərin eksperimental axtarışının nəticəsi olan əsas üsullar nəzərdən keçirilmişdir. Məruzələr tədbir iştirakçıları tərəfindən maraqla qarşılanıb.
Qeyd edək ki, Ş.Şahbazova IFSA cəmiyyətinin Azərbaycan üzrə üzvü seçilib.