Starship-in ilk orbital uçuşunun ikinci cəhdi gələn ay baş tuta bilər
18.09.2023 / Maraqlı məlumatlar
SpaceX şirkəti özünün Starship kosmik gəmisinin ilk orbital uçuşunun ikinci cəhdi üçün olan hazırlıqları yekunlaşdırmaq üzrədir. Elon Musk-ın sözlərinə əsasən hazırlıqların birinci mərhələsi artıq yekunlaşıb. Lakin kosmik gəminin ilk orbital uçuşunun ikinci cəhdini bir qədər gözləmək lazım gələcək. Belə ki, şirkət ABŞ Federal Mülki Aviasiya İdarəsindən (FAA) uçuş missiyasının yerinə yetirilməsinə icazə lisenziyasını əldə etməlidir. FAA isə bu icazəni şirkətə gələn ay təqdim edə bilər.
FAA administratorunun öhdəliklərini yerinə yetirən Polly Trottenberg-in sözlərinə əsasən icazənin oktyabr ayında təqdim edilməsi ehtimalı yüksəkdir. “Biz, SpaceX ilə yaxşı çalışır və produktiv müzakirələr aparırıq. Hər iki tərəfin komandası bir yerdə çalışır. Mən düşünürəm ki, biz, uçuşa icazə lisenziyasının gələn ay təqdim edilməsinə optimistik yanaşırıq” - deyə Trottenberg bildirib. Qeyd etmək lazımdır ki, FAA-dan uçuşa icazə lisenziyasının əldə ediləcəyi halda belə uçuş missiyasının yerinə yetirilməsi tarixlərində dəyişiklik ola bilər. Belə ki, SpaceX şirkəti FAA-dan əlavə olaraq ekologiya ilə bağlı bir neçə qurumdan da icazə almalıdır.
