Akademik Əli Abbasovun elmi biblioqrafiyası çap olunub

17.11.2023 / Mühüm xəbərlər

AMEA-nın Mərkəzi Elmi Kitabxanası və “Elm” nəşriyyatı tərəfindən AR Elm və Təhsil Nazirliyi İdarəetmə Sistemləri İnstitutunun baş direktoru, akademik Əli Abbasovun “Azərbaycanın elm və mədəniyyət xadimləri” seriyasından elmi biblioqrafiyası çap olunub. Biblioqrafiya alimin həyatını, 1976-2023-cü illəri əhatə edən elmi-pedaqoji və ictimai fəaliyyətini, elmi əsərlərini və onun haqqında yazılmış mənbələri əks etdirir.

Biblioqrafiyaya Ə.Abbasovun müəllifi, redaktoru və tərtibçisi olduğu monoqrafiyaları, kitabları, elmi məqalələri, tezisləri, dövri mətbuatda nəşr olunmuş elmi-publisistik məqalələri, müəlliflik şəhadətnamələri və patentləri daxil edilmişdir. Biblioqrafiyada alimin həyatının əsas tarixləri göstərilib, ictimai və elmi-pedaqoji fəaliyyəti haqqında qısa oçerk, görkəmli elm və dövlət xadimlərinin alim haqqında yazıları, rəhbəri və icraçısı olduğu layihələr, elmi rəhbəri və məsləhətçisi olduğu dissertasiya işləri öz əksini tapmışdır.

Biblioqrafiyanın elmi redaktoru professor Məmməd Əliyev, redaktoru Nərgiz Novruzova, ixtisas redaktoru Şahnaz Şahbazova, tərtibçisi Afət Məmmədovadır.

Biblioqrafiya avtomatlaşdırılmış layihələndirmə sistemləri, radiotexnika, elektronika sahələrində çalışan alim və mütəxəssislər, ali məktəb tələbələri, habelə geniş oxucu kütləsi üçün nəzərdə tutulub.