Starship-in ilk orbital uçuşunun ikinci cəhdi reallaşdırılıb
20.11.2023 / Maraqlı məlumatlar
Keçən həftənin sonunda SpaceX şirkəti Starship-in ilk orbital uçuşunun ikinci cəhdini reallaşdırdı. Qeyd etmək lazımdır ki, birinci cəhd aprel ayında baş tutmuşdu və uğursuz olmuşdu. Keçən həftənin sonunda reallaşdırılmış ikinci cəhd isə nisbətən uğurlu olub. Baş tutmuş uçuş missiyası çərçivəsində Starship şirkətin Texas ştatında yerləşən Starbase adlı kosmodromundan start götürüb. Bu dəfə Super Heavy raketinin Starship kosmik gəmisindən ayrılma prosesi uğurla nəticələnib.
Super Heavy-dən ayrılandan sonra kosmik gəmi öz gücü vasitəsilə uçuşunu davam etdirib. Məlumata əsasən Starship öz mühərriklərini hələ Super Heavy raketindən ayrılmadan öncə işə salıb. Bununla belə Starship-in sürətləndirici raketdən ayrılmasından sonra problemlər başlayıb. Birinci problem onda olub ki, uçuş missiyasının startından 9 dəqiqə sonra SpaceX kosmik gəmi ilə əlaqəni itirib. Nəticədə şirkət mühəndisləri Starship-ə partlamaq əmrini göndərməli olublar.
72 metr hündürlüyə sahib Super Heavy raketi ilə də hər şey yolunda getməyib. Belə ki, startdan təqribi olaraq 3 dəqiqə sonra baş vermiş ayrılma nəticəsində raket Meksika körfəzinə eniş edən zaman partlayıb. Bütün bunlara baxmayaraq Starship uçuşunu davam etdirərək kosmosa çata bilib. Məlumata əsasən kosmik gəmi 140 km yüksəkliyə qalxa bilib. Qeyd etmək lazımdır ki, kosmosa çıxış məhz 100 km-dən sonra başlayır. Starship-in həmin vaxtdakı sürəti isə saatda 24 000 km təşkil edib.
