Microsoft Windows 11-in 23619 nömrəli yeni test versiyasını istifadəyə verib. İstifadəyə verilmiş test versiyası maraqlı bir funksiyaya sahibdir. Söhbət, kompüter üzərindən smartfondakı foto və screenshot-lara sürətli keçid funksiyasından gedir. Məlumata əsasən Windows 11-in yeni versiyasında Snipping Tool funksiyası Android vasitəsilə çalışan smartfondakı son fotolara və screenshot-lara sadə və sürətli keçidi mümkün edir.

 

 

Bununla belə sözügedən funksiya vasitəsilə keçid edilən foto və screenshot-ları redaktə etmək də mümkündür. Bu funksiyanın Windows 11-də aktivləşdirilməsindən sonra smartfona əlavə ediləcək hər yeni foto zamanı kompüterdə həmin fotodan istifadə etmək təklifi əks olunacaq. Funksiyanı aktivləşdirmək üçün Windows 11-də ayarlara daxil olub növbəti sıralama üzrə keçidi reallaşdırmaq lazımdır. Bluetooth & devices -> Mobile devices -> Manage mobile devices. Manage mobile devices bölməsində funksiyanı aktivləşdirmək olar. Sözügedən yeni funksiyanın Windows 11-in stabil versiyasında nə zaman istifadəyə veriləcəyi bilinmir.