Görkəmli alim, akademik Arif Paşayevin 90 yaşı tamam olur
15.02.2024 / Mühüm xəbərlər
Hörmətli Arif müəllim!
Sizi 90 illik yubileyiniz münasibətilə səmimi-qəlbdən təbrik edirəm!
Sizin elmi və elmi-təşkilati fəaliyyətiniz Azərbaycanda fizika, texnika və aerokosmik sahələrinin elmi-texniki inkişafında əsaslı rol oynamış və Sizin şəxsiyyətiniz xüsusi xidmətləri olan görkəmli alim, bacarıqlı elm və təhsil təşkilatçısı, fəal ictimai xadim kimi ziyalılıq üçün bir nümunədir. Çoxşaxəli elmi fəaliyyətiniz dövründə aparılan tədqiqatların nəticələri istər elmi-nəzəri və tətbiqi, istərsə də strateji cəhətdən mühüm əhəmiyyətə malik olmaqla ixtira səviyyəsində işlənib, beynəlxalq sərgilərdə, müsabiqələrdə qızıl medal və diplomlara layiq görülüb.
Məhz Sizin Azərbaycanda ilk dəfə olaraq müasir dünya standartlarına cavab verən yeni tipli ali məktəbə - Milli Aviasiya Akademiyasına rəhbərlik edərək onu yüksək beynəlxalq nüfuzlu ali məktəb səviyyəsinə yüksəltməniz ölkədə mülki aviasiyanın bütün istiqamətləri üzrə yüksək ixtisaslı milli kadr potensialının təmin edilməsində misilsiz rol oynayır. İftixar hissi ilə qeyd edə bilərik ki, bu gün Milli Aviasiya Akademiyası geniş regionda ali, əlavə və xüsusi peşə-ixtisas təhsil proqramını, aviasiya mütəxəssislərinin ixtisaslaşmasını, yenidən hazırlığını, həmçinin bu sahədə müvafiq elmi-tədqiqat və təcrübi konstruktor işlərini həyata keçirən strateji əhəmiyyətə malik mülki aviasiyanın beynəlxalq standartlarına cavab verən ən nüfuzlu ali təhsil müəssisəsidir.
Sizin elmi əsərləriniz mühüm nəzəri və praktiki əhəmiyyət kəsb etməklə yanaşı, gənc alimlər, doktorantlar üçün də çox dəyərli olub, xarici ölkələrdə də alimlərimizə böyük şöhrət qazandırır. Kadr hazırlığı, təhsilin səviyyəsinin yüksəldilməsi, mühəndislik elmi-tədqiqatların koordinasiyası, praktiki layihələrin həyata keçirilməsi və beynəlxalq tədbirlərin təşkilinə bəxş etdiyiniz töhfələriniz Azərbaycan elminin dünya elminə inteqrasiyası istiqamətində mühüm rol oynayır.
Hörmətli Arif müəllim, Siz, həmçinin bir azərbaycanlı kimi ictimai-siyasi fəaliyyətinizlə xalqımızın xoşbəxtliyi, vətənimizin azadlığı və ölkəmizin suverenliyi uğrunda möhtərəm Prezidentimiz cənab İlham Əliyevin zəfərə aparan siyasətinə dəyərli töhfələrinizi verirsiniz. Siz əsl insan, etibarlı dost və müdrik şəxsiyyətsiniz.
Çox hörmətli Arif müəllim, İdarəetmə Sistemləri İnstitutunun kollektivi adından Sizi 90 illik yubileyiniz münasibətilə bir daha ürəkdən təbrik edir, cansağlığı və ailə səadəti, həmçinin Azərbaycan dövlətçiliyinin və elminin inkişafı istiqamətindəki fəaliyyətinizdə uğurlar arzulayıram.
İdarəetmə Sistemləri İnstitutunun baş direktoru
Akademik Əli Abbasov
