Kosmik hava durumu və proqnozu açıqlanıb
12.02.2024 / Maraqlı məlumatlar
Kosmik hava durumu – Hesabat dövrü ərzində Günəş fəallığı artmışdır. Maksimal aktivlik 3576 oblastında M9.04 və 3575 oblastında X3.38 alışmalar olmuşdur. Həftə ərzində alışmaların təsirindən ardıcıl olaraq Tac Kütlə Atılmaları, R2-R3 səviyyəli radiosiqnalların kəsilməsi, 10 sm dalğa uzunluğunda radioalışmalar və II-IV tip radioemissiya qeydə alınmışdır. Hal-hazırda Günəş ləkələrinin sayı artaraq, 8 ləkə qrupunda 144 ləkə müşahidə olunur.
Elm və Təhsil Nazirliyinin Şamaxı Astrofizika Rəsədxanasından verilən məlumata görə, enerjisi 2 MeV-dən çox olan elektron seli normal və orta səviyyədə olmuşdur. 10 MeV-dən çox enerji yüklü proton seli isə 09-12 fevral tarixlərində yüksələrək S2 səviyyəli radiasiya qasırğası baş vermişdir (maks: 187 pfu).
Hesabat dövründə Günəş küləyinin maksimal sürəti artaraq 1104 km/san, planetlərarası maqnit sahəsinin maksimal qiyməti Yer orbitində 19 nT, radial istiqamətdə isə -15 nT olmuşdur. 11 fevralda 40 nT geomaqnit impuls qeydə alınmışdır. Hal-hazırda Günəş küləyinin sürəti 494 km/san, planetlərarası maqnit sahəsinin maksimal qiyməti Yer orbitində 6 nT, radial istiqamətdə isə 4 nT təşkil edir.
Hesabat dövrü ərzində geomaqnit sahəsi 11 fevralda qısa müdddətli G1 səviyyəsinədək yüksəlmişdir. Hal-hazırda Kp indeksi ~2-yə bərabərdir, lakin Günəş küləyinin sıxlığı artmışdır.
Kosmik hava proqnozu – Proqnoz günlərində (12-18 fevral) C sinif alışmanın baş verməsi ehtimalı 99%, M (R1-R2) sinif alışmanın baş verməsi ehtimalı 65%, X (R3) sinif alışmanın baş verməsi ehtimalı isə 20% təşkil edir.
Enerjisi 2 MeV-dən çox olan elektron selinin normal və orta səviyyədə, 10 MeV-dən çox enerji yüklü proton selinin isə TKA təsiri nəticəsində yenidən S1 səviyyəsinə yüksələcəyi gözlənilir.
Günəş küləyi sürətinin 08 və 10 fevralda baş vermiş TKA-nın təsiri ilə artacağı gözlənilir.
Geomaqnit sahəsi – 08 və 10 fevralda baş vermiş TKA təsiri ilə 12-14 fevral tarixlərində geomaqnit sahəsinin aktivliyinin artması və G1 (zəif) - G2 (orta) səviyyəli geomaqnit qasırğası gözlənilir.
