Starship-in üçüncü orbital uçuş cəhdi 14 mart tarixində baş tuta bilər
11.03.2024 / Maraqlı məlumatlar
Elon Musk bildirib ki, müvafiq tənzimləyici orqanlardan icazələrin əldə edilməsindən sonra SpaceX-in Starship kosmik gəmisinin üçüncü orbital uçuş cəhdi 14 mart tarixində baş tuta bilər. Qeyd etmək lazımdır ki, Starship-in ikinci orbital uçuş cəhdi keçən ilin noyabr ayında baş tutmuşdu. Həmin uçuş missiyası çərçivəsində startdan 9 dəqiqə sonra şirkət Starship kosmik gəmisi ilə əlaqəni itirdi və nəticədə ona partlama əmri göndərildi. Super Heavy raketinə gəldikdə isə o, Starship-dən ayrılandan bir neçə dəqiqə sonra havada partladı. Musk həmin vaxtda ikinci cəhdi nisbətən uğurlu adlandırmışdı. Onun sözlərinə əsasən şirkət ikinci uçuş cəhdindən lazımi nəticələri əldə edib. Buna görə də Starship-in üçüncü orbital uçuş cəhdinin daha uğurlu olacağı gözlənilir.
