Neuralink-in təsisçisi və sahibi olan Elon Musk şirkətin yeni məhsulunu anons edib. Şirkətin yeni məhsulu Blindsight adlanır. Bu, görmə məhdudiyyətli insanlarda görmə qabiliyyətinin bərpa olunmasına hədəflənmiş çipdir. Qeyd etmək lazımdır ki, hələ bir neçə il bundan öncə Musk bildirmişdi ki, Neuralink bu cür fiziki problemlə qarşılaşmış şəxslərdə görmə qabiliyyətinin bərpasını reallaşdıra biləcək. Neuralink artıq yanvar ayında öz beyin çipini ilk pasientinə uğurla implantasiya etdi və həmin şəxs artıq fikir gücü vasitəsilə virtual şahmatın oynanılması kimi məşğuliyyəti rahatlıqla yerinə yetirə bilir.

     

Bu cür uğurdan sonra Musk-ın anons etmiş olduğu Blindsight adlı yeni çipin imkanlarının reallaşdırılması yaxın gələcəyin işidir. “Bizim, insanlarda hədəfləndiyimiz ilk tətbiqi məqsəd görmə qabiliyyətinin bərpa olunmasıdır. Düşünürəm ki, biz, hətta anadangəlmə görmə məhdudiyyətli insanlarda belə görmə qabiliyyətinin bərpa olunmasını mümkün edə biləcəyik” - deyə Musk qeyd edib. Musk hələ keçən ilin noyabr ayında bildirmişdi ki, Neuralink şirkəti computer vision çipi üzərində çalışır. Lakin onun tam hazır olması üçün bir neçə il vaxt lazım olacaq. Musk həmçinin bildirib ki, Blindsight-ın prototipi artıq meymunlar üzərində test edilir.