Microsoft və OpenAI şirkətləri öz aralarında olan sıx əməkdaşlığı davam etdirirlər. Yeni məlumata əsasən bu iki şirkət birgə səylər vasitəsilə süni zəkaya sahib Stargate adlı böyük superkompüteri hazırlamağı planlaşdırır. Stargate layihəsi ABŞ-da məlumatların emalı üçün nəzərdə tutulmuş ən böyük mərkəzin yaradılmasına hədəflənib. Bu cür mərkəz özündə milyonlarla süni zəka çipini birləşdirə bilər.

     

Bu mərkəz Microsoft və OpenAI şirkətlərinin növbəti 6 il ərzində birgə şəkildə yaratmağı planlaşdırdıqları 5 ədəd süni zəka mərkəzindən biri olacaq. Stargate 2028-ci ilə kimi işə düşməlidir. Məlumata əsasən sözügedən layihənin dəyəri 100 milyard dollar təşkil edir və bu məbləğin böyük hissəsi çox güman ki, məhz Microsoft tərəfindən təmin ediləcək. İki şirkət bu cür mərkəz üçün lazım olan mikrosxemlərin təchizatçısı qismində AMD və NVIDIA şirkətlərini nəzərdən keçirirlər. Bununla belə nəticədə Microsoft ilə OpenAI fərdi mikrosxemlərin istehsalı variantını da seçə bilərlər.