Starship dördüncü orbital uçuşa hazırlaşır
05.04.2024 / Xəbərlər
SpaceX şirkəti aktiv şəkildə Starship-in dördüncü orbital test uçuşuna hazırlaşır. Şirkət artıq Starship-in ilk pilləsini və 33 ədəd Raptor mühərrikinə sahib Super Heavy raketini SpaceX-in Starbase adlı kosmodromunun start meydançasına yerləşdirib. Məlumata əsasən Super Heavy statik testlərə hazırlaşır. Bu testlər çərçivəsində şirkət raketin 33 ədəd mühərrikini bir neçə saniyəlik işə salacaq. Qeyd etmək lazımdır ki, Starship-in ilk orbital uçuş cəhdi keçən ilin aprel ayında, ikinci uçuş cəhdi həmin ilin noyabr ayında, üçüncü uçuş cəhdi isə keçən ay baş tutdu. İlk uçuş cəhdi uğursuz, ikinci uçuş cəhdi nisbətən uğurlu, üçüncü uçuş cəhdi isə uğurlu olmuşdu. Qeyd etmək lazımdır ki, üçüncü uçuş cəhdi çərçivəsində Starship Yer kürəsinin orbitinə çatsa da, atmosferə yenidən daxil olan zaman partlamışdı. SpaceX dördüncü orbital uçuşu may ayının əvvəlinə planlaşdırır.
