SpaceX şirkəti kosmik turizmdən faydalanmaq istəyən hər kəsdən müraciətləri qəbul etməyə başlayıb. Şirkət hal-hazırda kosmik turistlərə Yer kürəsinin orbitinə və BKS-ə (Beynəlxalq Kosmik Stansiya) uçuşları təklif edir. Gələcəkdə isə şirkət kosmik turistlərə həmçinin Ay və Marsa uçuşları təklif edəcək. Yer kürəsinin orbitinə və BKS-ə uçuşlar üçün SpaceX şirkəti Dragon Capsule adlı kosmik aparatdan və Falcon 9 raketindən istifadə edəcək. Gələcəkdə baş tutması gözlənilən Ay və Mars uçuşlarında isə şirkət artıq Starship kosmik gəmisindən istifadə edəcək. SpaceX bildirib ki, Yer kürəsinin orbitinə uçuş turu 3 gündən 6 günə kimi, BKS-ə uçuş turu isə 10 günlük olacaq.

     

Ay və Mars uçuşları barəsində konkret bir məlumat olmasa da, şirkətin sözlərinə əsasən Ay uçuş turu 12 nəfər sərnişin üçün 1 həftə davam edəcək. SpaceX kosmik turizm ilə bağlı uçuş biletlərinin qiymətlərini açıqlamayıb. Lakin NASA təmsilçiləri bildiriblər ki, kosmik agentlik Dragon adlı kapsulda öz astronavtları üçün sərnişin yerlərinə görə SpaceX-ə 55 milyon dollar vəsait ödəyib. Qeyd etmək lazımdır ki, Blue Origin və Virgin Galactic şirkətləri daha büdcəli kosmik turizm imkanlarını təklif edirlər. Lakin bu şirkətlərin uçuş proqramları və aparatları SpaceX-in imkanlarından tamamilə fərqlənirlər. SpaceX öz ilk turistik orbital uçuşunu bu ilin sonuna planlaşdırır. BKS-ə isə turistik uçuşların gələn il baş tutacaqları gözlənilir.