Edge brauzeri videoların real zaman ərzində tərcüməsi funksiyasını əldə edib
23.05.2024 / Maraqlı məlumatlar
Microsoft şirkəti yenilənmiş Edge brauzerini təqdim edib. Yenilənmiş Edge brauzeri süni zəka əsasında çalışan çox faydalı yeni funksiyanı əldə edib. Söhbət, real zaman ərzində videoların müxtəlif dillərə tərcüməsi funksiyasından gedir. Qeyd etmək lazımdır ki, sözügedən funksiya tərcüməni həm altyazı şəklində həm də dublyaj şəklində edə bilir. Məlumata əsasən süni zəka əsasında çalışan bu yeni funksiya videonu hər hansısa digər dilə real zaman ərzində tərcümə edir. Yəni video daha öncə hansısa emal prosesindən keçmir.
Təqdim edilmiş videodan da görmək olar ki, Microsoft CEO-su Satya Nadella-nın ingilis dilində çıxışını ispan dilinə tərcümə etmək üçün sözügedən funksiyaya bir neçə saniyə vaxt lazım olur. Məlumatda qeyd edilib ki, Edge brauzeri tərkibində bu funksiya artıq YouTube, LinkedIn, Coursera platformalarını və eləcə də CNBC və Bloomberg saytlarını dəstəkləyir. Brauzer ingilis dilindən ispan, rus, alman, hind, italyan və ispan dillərinə tərcüməni reallaşdıra bilir. Gələcəkdə Microsoft bu yeni funksiyaya digər saytlar ilə dillərin dəstəklərini də əlavə edəcək. Real zaman ərzində tərcümə funksiyasının Edge brauzerinin bütün istifadəçiləri üçün nə zaman aktiv olacağı bilinmir.
