Microsoft, səsinizi təqlid edərək zənglərə cavab verən süni intellekt üzərində işləyir!
24.05.2024 / Maraqlı məlumatlar
Truecaller və Microsoft-un birgə əməkdaşlığı ilə hazırlanmış süni intellekt köməkçisi, səsinizi təqlid edəcək və zəng gələn zaman sizin əvəzinizə cavab verə biləcək.
Bu süni intellekt tərəfindən dəstəklənən xüsusiyyət, Microsoft-un Azure AI Speech texnologiyası ilə mümkün olub. Truecaller istifadəçiləri, proqram vasitəsilə qısa səs yazaraq əsl səsinizə bənzəyən rəqəmsal səs nüsxələrini yarada biləcəklər. Beləliklə, zəng gələn zaman süni intellektlə işləyən köməkçi, qarşıdakı şəxsə səsinizlə cavab verə biləcək. Məsələn, siz məşğul olduğunuz zaman telefonunuza zəng gəlir və siz ona cavab verə bilmirsiniz. Bu zaman Truecaller köməkçisi hərəkətə keçir və "Hey Truecaller, bu zəngə cavab ver!" dediyiniz zaman isə zəng edən şəxsi salamlayır. Bu xüsusiyyət, qarşıdakı şəxsi salamlamaqla yanaşı, səsinizlə daha mürəkkəb cavablar da yarada bilir.
Bundan əlavə, köməkçi, həm zəngləri yaza, həm də sizə səsli mesajlar göndərə bilir. Truecaller-in süni intellektlə işləyən xüsusiyyəti təkcə zənglərə cavab verməklə məhdudlaşmır. Microsoft-un Personal Voice texnologiyası sayəsində köməkçiniz səsinizi tanıya və sizin üçün fərdiləşdirilmiş cavablar yarada biləcək. Məsələn, restoran rezervasiyası edərkən və ya müştəri xidməti nümayəndəsi ilə danışarkən köməkçiniz səsinizdən istifadə edə bilər. Bu xüsusiyyət müxtəlif proqramlarla da birləşdirilə bilər. Məsələn, mesajlaşma proqramlarında və ya sosial media platformalarında köməkçiniz səsinizlə cavablar tərtib edə bilər. Bu o deməkdir ki, siz rəqəmsal dünyada tamamilə sizə xas olan səslə mövcud ola bilərsiniz.
Süni intellektlə işləyən zənglərin cavablandırılması funksiyası yaxın həftələrdə ABŞ, Kanada, Avstraliya, Cənubi Afrika, Hindistan, İsveç və Çilidəki istifadəçilər üçün əlçatan olacaq. İlk olaraq ictimai beta istifadəçiləri üçün əlçatan olacaq xüsusiyyət, daha sonra uyğun bazarlardakı bütün istifadəçilərə təqdim ediləcək. Truecaller və Microsoft arasındakı bu əməkdaşlıq telefon istifadənizdə inqilabi dəyişikliyə səbəb ola bilər. Diqqət yetirsəniz, texnologiya indi toxunmadan hər şeyi edə bildiyimiz istiqamətə doğru inkişaf edir.
