“Round University Rankings” dünya universitetlərinin 2024-cü il üçün reytinqi açıqlanıb. Reytinq cədvəlində 89 ölkədən 1169 ali təhsil müəssisəsi yer alıb.

 

Azərbaycanın 8 ali təhsil müəssisəsi sözügedən qlobal reytinqə daxil olub. 6 ali təhsil müəssisəmizin mövqeyi ötən ilə nisbətən irəliləyib, 2 ali təhsil müəssisəmiz (Gəncə Dövlət Universiteti və Azərbaycan Universiteti) isə ilk dəfə reytinqdə təmsil olunublar.

 

Qərbi Kaspi Universiteti, Bakı Dövlət Universiteti və Azərbaycan Dövlət İqtisad Universiteti müvafiq reytinqdə TOP 1000-də təmsil olunur.

 

Qərbi Kaspi Universiteti 96 pillə irəliləyərək 934-cü, Bakı Dövlət Universiteti 80 pillə irəliləyərək 962-ci, Azərbaycan Dövlət İqtisad Universiteti 134 pillə irəliləyərək 983-cü, Bakı Biznes Universiteti 17 pillə irəliləyərək 1142-ci, Azərbaycan Memarlıq və İnşaat Universiteti 86 pillə irəliləyərək 1094-cü, Azərbaycan Texniki Universiteti isə 70 pillə irəliləyərək 1126-cı yerdə qərarlaşıb.

 

Qeyd edək ki, reytinqin metodologiyasına əsasən ali təhsil müəssisələrinin fəaliyyəti 4 sahə (tədris, tədqiqat, beynəlmiləlləşmə və maliyyə dayanıqlığı) və 20 indikator üzrə qiymətləndirilir.