Intel süni zəka vasitəsilə foto tərtibatı tətbiqini təqdim edib
07.06.2024 / Maraqlı məlumatlar
Intel şirkəti Computex 2024 sərgisi çərçivəsində AI Playground adlı tətbiqini təqdim edib. Bu, süni zəka vasitəsilə fotoların tərtibatı üçün nəzərdə tutulmuş tətbiqdir. AI Playground adlı tətbiqin iki əsas özəlliyi var. Birinci özəllik ondan ibarətdir ki, tətbiq lokal şəkildə kompüterdə çalışacaq. Yəni onun çalışması üçün bulud serverlərdən istifadə edilməyəcək. İkinci özəllik isə ondadır ki, tətbiq tamamilə pulsuzdur. Məlumata əsasən AI Playground tətbiqinin çalışması üçün Intel Arc qrafikasına sahib Intel Core Ultra prosessoru lazım olacaq.
Intel Arc-ın əvəzinə Intel-in minimum 8 GB-lıq VRAM-a sahib diskret videokartı da istifadə edilə bilər. Tətbiqin interfeysi çox sadədir. O sadəcə olaraq 3 qovluqdan təşkil edilib. Create, Enhance və Answer. Intel bildirib ki, sözügedən tətbiqin hazırlanması çərçivəsində əsas diqqət ondan istifadədə rahatlığa ayrılıb. Adi istifadəçi üçün qəliz ola biləcək ayarlar “piksel göstəricisi” və “keyfiyyət” kimi anlaşılan bəndlərdə birləşdirilib. Bununla belə istifadəçi öz istəyinə uyğun olaraq ayarların genişləndirilmiş interfeys rejimindən də istifadə edə bilər. AI Playground tətbiqi artıq yaxın zamanda istifadəyə veriləcək.
