Avropa Birliyi süni zəka ilə bağlı qanun layihəsini rəsmi şəkildə təsdiqləyib
17.07.2024 / Xəbərlər
Avropa Birliyi rəsmi şəkildə süni zəka üzrə qanun layihəsini təsdiqləyib. Bu qanun layihəsi texnoloji şirkətlərin bu sahə üzrə tənzimlənmələrinə hədəflənmiş kompleksli qaydaları özündə birləşdirir. Sözügedən qanun layihəsinin hazırlanmasına 2 il vaxt sərf edilib. O, süni zəkadan müəyyən istifadə növlərini qadağan edir və tərtibatçıların fəaliyyətlərinə ciddi tələblər irəli sürür. Beləliklə Avropa Birliyi süni zəkanın tənzimlənməsi istiqamətində ciddi adım atıb. Təsdiq edilmiş qanun layihəsi 1 avqust tarixindən qüvvəyə minəcək. O, Avropa Birliyi ərazisində süni zəka texnologiyalarının hazırlanması və tətbiqi mövzularında sərt qaydaları təmin edir.
Bu qanun layihəsi əsasən insan hüquqları üçün təhlükəli ola biləcək süni zəka əsaslı tətbiqlərin istifadəsini qadağan edir. Bununla yanaşı süni zəka vasitəsilə internetdən və müşahidə kameralarından insanların üz təsvirlərinin əldə edilməsi də qadağan edilib. Süni zəka sistemlərinin tərtibatçıları öz texnologiyalarının necə çalışdıqlarına dair şəffaflığı təmin etməli olacaqlar. Onlar həmçinin öz süni zəka sistemlərinin təlimatlandırılmaları prosesində hansı növ məlumatlardan istifadə edildiyini açıqlamalı olacaqlar. Qanun layihəsinə əsasən qaydaların tələbləri 2026-cı ilin avqust ayına kimi yerinə yetirilməlidir.
Lakin kritik vacib infrastruktura inteqrasiya edilmiş və əhalinin məşğulluğuna, səhiyyə və hüquq sahələrinə bilavasitə təsir göstərən daha yüksək riskli süni zəka sistemləri üçün qaydaların tələbləri 2027-ci ilin avqust ayına kimi yerinə yetirilə bilər. Süni zəka üzrə qanunvericiliyin qaydalarının pozulmaları halında bu, böyük cərimələrə səbəb olacaq. Məsələn süni zəkadan müəyyən istifadə növlərinin qadağası qaydasının pozulması halında bu və ya digər şirkət 35 milyon avro (38 milyon dollar) dəyərində və ya onun illik dövriyyəsinin 7%-i həcmində cərimələnəcək.
