4D formatlı videoların tərtibatı üçün Stable Video 4D adlı süni zəka modeli təqdim edilib
25.06.2024 / Xəbərlər
Generativ süni zəka sistemlərinin məşhurluqları fonunda videoların tərtibatı üçün nəzərdə tutulmuş artıq çoxlu sayda süni zəka sistemi mövcuddur. Onlara misal olaraq Luma AI, Sora və Haiper-i misal gətirmək olar. Mətn formatında təsvirlər əsasında fotoların tərtibatını reallaşdıran süni zəka sistemləri ilə tanınan Stability AI şirkəti süni zəka vasitəsilə video tərtibatı mövzusunda daha fərqli məhsulunu təqdim edib. Söhbət, Stable Video 4D adlı süni zəka modelindən gedir. Adından da bəlli olduğu kimi bu süni zəka modeli 4D formatlı videoların tərtibatı üçün nəzərdə tutulub. Bu yeni süni zəka modeli şirkətin artıq mövcud olan Stable Video Diffusion adlı digər süni zəka modelinə əsaslanır.
Stable Video Diffusion öz növbəsində fotoları videolara çevirməyə istiqamətlənib. Stable Video 4D isə əldə edilən videolardan 8 müxtəlif perspektivə sahib videolar yaradaraq bu konsepti inkişaf etdirir. 3D dedikdə adətən dərinliyə sahib foto və ya video anlaşılır. Lakin 4D bir çoxlarının düşündüyü kimi əlavə fəza əlavə etmir. Əslində 4D özündə eni, hündürlüyü, dərinliyi və zamanı birləşdirir. Bu o deməkdir ki, Stable Video 4D hərəkətdə olan 3D obyektləri müxtəlif baxış nöqtələrindən və müxtəlif zaman anlarında baxmağa imkan verir. Hal-hazırda Stable Video 4D sadə fona və bir obyektə sahib bir neçə saniyəlik videonu emal edə bilir. Bu süni zəka modelinin daha qəliz videoları emal etməsi üçün Stability AI şirkətinin tərtibatçıları onu təkmilləşdirməyi planlaşdırırlar.
