Starlink smartfonlarda pulsuz SOS xidmətini istifadəyə verəcək
29.08.2024 / Maraqlı məlumatlar
Elon Musk elan edib ki, SpaceX şirkətinin Starlink adlı peyk interneti layihəsi bütün dünyada pulsuz şəkildə təcili SOS xidmətini istifadəyə verəcək. Qeyd etmək lazımdır ki, Google və Apple şirkətləri öz cihazlarında peyk rabitəsini premium xidmət kimi təklif edir. Starlink isə bu imkanı bütün smartfon istifadəçiləri üçün əlçatan etməyi hədəfləyib. Yer kürəsinin uzaq nöqtələrində olacaq insanlar hətta mobil şəbəkəyə sahib olmadıqları halda belə bunun sayəsində təcili yardım xidmətləri ilə əlaqə qura biləcəklər.
Günümüzdə smartfonlar mobil şəbəkə qüllələrindən asılıdırlar. Bu isə smartfonların uzaq nöqtələrdə funksionallıqlarını məhdudlaşdırır. Starlink isə öz növbəsində Yer kürəsinin orbitində 6000-dən çox peykə sahib olmaqla hətta planetin ən uzaq nöqtələrində belə qlobal geniş zolaqlı rabitəni təklif edərək uzaq nöqtələrdə internetə çıxış imkanını əlçatan edir. Qeyd etmək lazımdır ki, təcili SOS xidmətinin qlobal şəkildə istifadəyə verilməsi üçün Starlink hər bir ölkədən xüsusi icazə almalıdır. Lakin nəzərə alsaq ki, bu xidmət çərçivəsində istifadəçi yalnız təcili yardım xidmətləri ilə əlaqə saxlayacaq, bu halda icazənin alınması prosesi sadələşdirilə bilər.
