ChatGPT tətbiqinin Windows versiyası istifadəyə verilib
21.10.2024 / Maraqlı məlumatlar
Windows kompüterlərinin istifadəçiləri indiyənə kimi ChatGPT-nin funksiyalarından çat-botun yalnız veb versiyası çərçivəsində istifadə edə bilirdilər. Lakin OpenAI şirkəti sonunda ChatGPT tətbiqinin Windows versiyasını istifadəyə verib. ChatGPT-nin Windows üçün nəzərdə tutulmuş versiyası Microsoft Store-da aktivdir. Lakin tətbiq hələ test versiyası şəklində istifadəyə verilib. Buna görə də ondan heç də bütün istifadəçilər hələ istifadə edə bilməyəcəklər.
ChatGPT-nin Windows versiyası hal-hazırda yalnız ChatGPT Plus, Enterprise, Team və Edu tariflərinin abunəçiləri üçün aktivdir. Tətbiqin Windows versiyasında dəstəklənən funksiyalara gəldikdə isə istifadəçilər çat-botla dialoq qura, onun vasitəsilə fotolar tərtib edə və üstəlik çat-bota analiz üçün fotolar ilə sənədlər göndərə bilərlər. Tətbiqdə səsli ünsiyyət ilə GPT Store platforması hələ reallaşdırılmayıb. OpenAI bu ilin sonuna kimi tətbiqin daha geniş funksionallığa sahib versiyasını təqdim etməyi planlaşdırır. Çox güman ki, həmin vaxtda tətbiq bütün istifadəçilər üçün aktiv olacaq.
