"Gələcəklə ünsiyyət" layihəsi çərçivəsində XIV beynəlxalq konfrans keçirilib

28.10.2024 / Mühüm xəbərlər

Oktyabrın 23-də Türkiyə Radio və Televiziya Ali Şurasının (RTÜK), Elm və Ali Təhsil üzrə Dövlət Agentliyinin (EATDA) və Naxçıvan Dövlət Universiteti - NDU tərəfdaşlığı və birgə təşkilatçılığı ilə "Gələcəklə ünsiyyət" layihəsi çərçivəsində beynəlxalq konfrans keçirilib.
Konfransda RTÜK-ün sədr müavini Orhan Karadaş və onun rəhbərlik etdiyi nümayəndə heyəti, NDU-nun rektoru Elbrus İsayev, Naxçıvan Muxtar Respublikasının təhsil naziri Elxan Nəcəfov, EATDA-nın Beynəlxalq əməkdaşlıq şöbəsinin müdiri Müjdat Həsənov, Azərbaycanın Türkiyədəki Səfirliyinin təhsil məsələləri üzrə müşaviri Nəcibə Nəsibova iştirak ediblər.

Konfransın əsəs məqsədi Türkiyədə təhsil alan xarici tələbələrin ictimai fəaliyyətinin təşviqi, eyni zamanda rəqəmsal media və kommunikasiya dünyasında baş verən köklü dəyişikliklərə toxunaraq rəqəmsal transformasiya prosesində media sənayesinin inkişafını təhlil etmək olub. Bu xüsusda xarici tələbələr tərəfindən “Ənənəvi Radionunun Dəyişikliyi: Spotify & Podcast”, “Kütləvi İnformasiya Vasitələrində Piktoqrafik Dilin Təkamülü”, “KİV yolu ilə Mədəniyyətin Aşılanması Xüsusunda cizgi filmləri” kimi mövzularda təqdimatlar edilib.
Ümumilikdə, konfrans ali təhsilin beynəlmiləlləşməsi çərçivəsində Azərbaycanda təhsil alan yerli və xarici tələbələrlə Türkiyədə təhsil alan xarici tələbələr arasında mədəni və akademik əlaqələrin qurulması, eləcə də qarşılıqlı əlaqələrin qurulması baxımından müsbət xarakterizə edilir.

Konfransda Türkiyə Respublikasının müxtəlif ali təhsil müəssisələrində təhsil alan Azərbaycan, Türkiyə, Özbəkistan, Qazaxıstan, Mərakeş, Rusiya və digər ölkələrdən olmaqla, ümumilikdə 15 ölkədən 30-a yaxın xarici tələbə iştirak edib. Konfrans öz işini Türkiyənin Qars və Sarıqamış şəhərlərində davam edəcəkdir.

Elm və Ali Təhsil üzrə Dövlət Agentliyi