Google Play-də tətbiqlər barəsində məlumatlar verəcək süni zəka əsaslı çat-bot istifadəyə veriləcək
01.11.2024 / Maraqlı məlumatlar
Google Play-in yeni beta versiyasında maraqlı süni zəka funksiyasının təsviri aşkar edilib. Məlumata əsasən Google Play üçün hazırlanan yeni süni zəka əsaslı funksiya sayəsində tətbiqləri yükləmədən onlar barəsində ətraflı məlumatı əldə etmək mümkün olacaq. İnsayderlər bu funksiyanın necə reallaşdırılacağı barəsində məlumat veriblər.
Məlumata əsasən yeni funksiya “Ask a question” adlanır və o, Google Play-in kodunda aşkar edilib. Lakin funksiya tətbiqlər mağazasının interfeysinə hələ əlavə edilməyib. Gözləntilərə əsasən sözügedən yeni funksiya istifadəçilərin tətbiqlər haqqında verəcəkləri suallar üçün nəzərdə tutulmuş xüsusi sahə formasında reallaşdırılacaq. Yəni istifadəçinin suallarına cavabları süni zəka əsaslı çat-bot təqdim edəcək. Lakin çat-botun öz cavablarını hansı kriteriyalar üzrə tərtib edəcəyi bilinmir. Funksiyanın Google Play-də nə zaman istifadəyə veriləcəyi aydın deyil.
