Windows 10-un rəsmi dəstəyi 14 oktyabr 2025-ci il tarixində dayandırılacaq. Microsoft şirkəti elan edib ki, sözügedən əməliyyat sisteminin dəstəyinin dayandırılmasından sonra istifadəçilər dəstək müddətini 1 il uzada biləcəklər. 14 oktyabr 2025-ci il tarixindən sonra Windows 10 üçün əlavə 1 illik dəstək xidmətini əldə etmək istəyən istifadəçilər Extended Security Updates (ESU) proqramına qoşulmalı və 30$ ödəniş etməli olacaqlar.

     

Nəticədə istifadəçilər əlavə 1 il ərzində Windows 10 üçün təhlükəsizlik yenilənmələrini əldə edə biləcəklər. Məlumata əsasən müəssəsilər üçün ESU xidmətinin ilk ili 61$-a, ikinci ili 122$-a, üçüncü ili isə 244$-a başa gələcək. ESU proqramına qoşulmuş kompüterlər üçün şirkət kritik və vacib təhlükəsizlik yenilənmələrini təqdim edəcək. Lakin onlar üçün artıq yeni Windows funksiyaları istifadəyə verilməyəcək. Bununla yanaşı onlar Windows ilə bağlı texniki dəstək xidmətindən də məhrum olacaqlar. Bununla belə Microsoft şirkəti ESU proqramına qoşulma əvəzinə Windows 11-ə keçid etməyi məsləhət görür.