Magistr dissertasiyalarının müdafiəsi keçirildi
12.06.2018 / Xəbərlər12 iyun 2018-ci il tarixində AMEA İnformasiya Texnologiyaları İnstitutunda magistrantların magistrlik dissertasiyalarının müdafiəsi üçün təşkil olunmuş ixtisaslaşdırılmış Müdafiə Şurasının iclası keçirildi. İclasda İnformasiya Texnologiyaları İnstitutunun 3, İdarəetmə Sistemləri İnstitutunun 5 magistrantı magistrlik dissertasiya işlərini təqdim etdilər.
İdarəetmə Sistemləri İnstitutunun 249153 – “İdarəetmənin informasiya texnologiyaları” ixtisaslaşması üzrə 2 magistrantı – Lamiyə Nəcəfova “Azərbaycan dilindəki mətnlərin müəlliflərinin identifikasiyası üçün alqoritm və proqram təminatının işlənilməsi” mövzusunda və Nigar Alışzadə “Hidroelektrik stansiyaların aqreqatlarının diaqnostikası üçün intellektual informasiya texnologiyalarının işlənilməsi (Mingəçevir Su Elektrik Stansiyası (SES) misalında)” adlı dissertasiya işlərini təqdim etdilər.
Dissertasiya işləri təqdim edildikdən sonra müzakirələr aparıldı, Şura üzvləri çıxış edərək öz sual, təklif və tövsiyələrini səsləndirdilər.
Dissertasiya işlərinin müzakirəsindən sonra açıq səsvermə keçirildi, hər bir iş üzrə qiymətləndirmə aparıldı. Qiymətləndirmənin nəticələrinə əsasən Lamiyə Nəcəfova və Nigar Alışzadəyə magistr elmi dərəcəsinin verilməsi haqqında qərar qəbul olundu.