Kaliforniya Texnologiya İnstitutunun tədqiqatçıları insan düşüncələrinin sürətini təyin etməyi bacarıblar. Aparılmış yeni tədqiqat beynin məlumatı emal etməsi sürəti ilə insan bədəninin müxtəlif sensorlardan təşkil edilmiş sisteminin məlumatları yığma sürəti arasındakı əhəmiyyətli dərəcədə uyğunsuzluğu ortaya çıxarıb. Beləliklə aparılmış tədqiqat sayəsində mütəxəssislər təyin ediblər ki, insan beyni məlumatı saniyədə sadəcə 10 bit sürətlə emal edir. Lakin insan bədənindəki müxtəlif sensorlar vasitəsilə məlumatların yığılması sürəti saniyədə milyard bit-ə çatır. Bu isə düşüncə proseslərindən 100 milyon dəfə daha sürətlidir.

     

Nəticədə alimlərdə belə bir sual yaranıb. Beyin insanın ətraf dünyanı dərk etməsi və müəyyən qərarları qəbul etməsi üçün kifayət edən 10 bit-lik sürəti ayıraraq bu qədər məlumatı hansı üsul ilə filtrasiyadan keçirir? Aparılmış tədqiqat nəticəsində əldə edilmiş məlumatlar yeni neyrobioloji tədqiqatlar üçün əsas yaradırlar. Bu tədqiqatın ortaya çıxarmış olduğu daha bir sual odur ki, nəyə görə beyin sensorlu sistem kimi bir anda paralel olaraq bir neçə fikri deyil, yalnız bir fikri emal edir? Alimlər güman edirlər ki, bu, insan beyninin necə inkişaf etməsi ilə əlaqəlidir. Belə ki, sinir sisteminə sahib ilk canlılar öz beyinlərini ilk növbədə naviqasiya üçün istifadə edirdilər. Qida istiqamətində hərəkət etmək və yırtıcılardan uzaqlaşmaq. İndi də eyni proses gedir. Bir anda yalnız bir fikrin emalı.