İdarəetmə Sistemləri İnstitutunda Xocalı soyqırımına həsr olunmuş anım tədbiri keçirilib
26.02.2025 / Mühüm xəbərlər
AR Elm və Təhsil Nazirliyi İdarəetmə Sistemləri İnstitutunda (İSİ) Xocalı soyqırımının 33-cü ildönümünə həsr olunmuş anım tədbiri keçirilib. Tədbirdə institutun rəhbərliyi, şöbə və laboratoriya müdirləri, alim və mütəxəssislər iştirak ediblər.
Öncə faciə qurbanlarının əziz xatirəsi bir dəqiqəlik sükutla yad edilib. Sonra Xocalı faciəsinin tarixi gedişatını əks etdirən videoçarx nümayiş olunub.
Tədbiri İSİ-nin icraçı direktor vəzifəsini müvəqqəti icra edən, t.e.d., dosent Elxan Səbziyev açaraq 1992-ci il fevralın 25-dən 26-na keçən gecə erməni silahlı qüvvələrinin keçmiş SSRİ-nin 366-cı motoatıcı alayının köməyi ilə xüsusi amansızlıqla Xocalı şəhərində həyata keçirdiyi genosidin təkcə Azərbaycan xalqına deyil, bəşəriyyətə qarşı yönəlmiş ən ağır cinayətlərdən biri olduğunu qeyd edib. Faciənin tarixi köklərindən və gedişatından bəhs edən alim bu hadisələrin xalqımıza qarşı həyata keçirilən iki yüz illik işğalçılıq siyasətinin davamı olduğunu bildirib.
Xocalı soyqırımının dünya miqyasında tanıdılması istiqamətində görülən işlərdən bəhs edən E.Səbziyev bildirib ki, faciəyə siyasi-hüquqi qiymət vermək üçün Ulu Öndər Heydər Əliyevin təşəbbüsü ilə 1994-cü ilin fevralında Azərbaycan Respublikasının Milli Məclisi Xocalı Soyqırımı Günü haqqında qərar qəbul edib, fevralın 26-sı “Xocalı Soyqırımı Günü” elan edilib. Ötən illərdə dövlət başçısı cənab İlham Əliyevin göstərişi ilə Xocalı şəhidlərinin xatirəsini əbədiləşdirmək üçün yerli və beynəlxlaq tədbirlər həyata keçirilib, dünyanın əksər ölkələrində onların xatirəsinə abidələr ucaldılıb.
Müzəffər Ali Baş Komandan İlham Əliyevin rəhbərliyi ilə şücaətli Azərbaycan Ordusu tərəfindən İkinci Qarabağ müharibəsi nəticəsində tarixi ədalətin bərpa edildiyini, Xocalı soyqırımı qurbanlarının qisasının alındığını bildirən E.Səbziyev onları ehtiramla yad edib, əziz xatirələrinin xalqımızın qəlbində daim yaşayacağına əminliyini ifadə edib.
Sonra professor Knyaz Məmmədov, dosentlər Məzahir İsayev, Gülçin Abdullayeva, Ələkbər Axundov və Aygün Əliyeva çıxış edərək Xocalı faciəsinin tarixi gedişatı və səbəblərindən bəhs edib, xatirələrini bölüşərək qarşıda duran hədəfləri nəzərə çatdırıblar.
