Meta Platforms, süni zəka sistemlərini sürətləndirmək üçün öz istehsalı olan MTIA çip ailəsi haqqında ilk dəfə 2 il əvvəl məlumat paylaşmışdı. Reuters-in məlumatına görə, artıq bu çiplərlə süni zəka sistemlərinin təlimatlandırılması prosesi başlayıb. Hal-hazırda, bu təlimatlandırma prosesi məhdud sayda MTIA çipləri ilə həyata keçirilir. Lakin uğurlu nəticələr əldə olunarsa, Meta bu çipləri kütləvi istehsala keçirməyi planlaşdırır. Bu keçid Meta üçün hansı üstünlüklər yarada bilər? Öz çiplərinə keçid şirkətin hesablama infrastrukturuna çəkilən xərclərini azaltmağa kömək edəcək. Cari ildə Meta-nın ümumi xərcləri 114-119 milyard dollar arasında dəyişəcək.

Bunun 65 milyard dolları infrastrukturun inkişafına yönəldiləcək. Meta-nın öz çipləri süni zəka sistemlərinin hesablamaları zamanı enerji istehlakını azaltmağa kömək edə bilər. Bu sahədə ixtisaslaşdırılmış həllər universal GPU-larla müqayisədə daha səmərəli ola bilər. Meta üçün çipləri Tayvanın TSMC şirkəti istehsal edəcək. Mənbələrin məlumatına görə, istehsala hazırlıq və ilk test partiyasının buraxılması Meta-ya 100 milyonlarla dollara başa gələ bilər. Əgər ilk partiya gözləntiləri doğrultmasa, yeni inkişaf mərhələsi yenidən böyük xərclər və bir neçə aylıq gecikmə tələb edəcək. Şayiələrə görə, Meta daha əvvəl “məntiq yürüdən süni zəka” üçün nəzərdə tutulmuş bir çipin buraxılışını ləğv edib.

Bunun əvəzinə, NVIDIA-dan böyük həcmdə süni zəka sürətləndiriciləri almağa qərar verib. Bu gün Meta Platforms hələ də NVIDIA çiplərinin ən böyük alıcılarından biridir. Şirkət hələlik NVIDIA sürətləndiricilərindən tamamilə imtina etməyi planlaşdırmır. Keçən il Meta, öz sosial şəbəkələrində istifadə edilən "məntiq yürüdən süni zəka" üçün öz çiplərini sınaqdan keçirməyə başlayıb. Ötən həftə Meta rəsmiləri bildiriblər ki, şirkət 2026-cı ildən etibarən böyük dil modellərinin təlimatlandırılması üçün öz çiplərindən istifadə edəcək. İlk mərhələdə bu çiplər tövsiyə alqoritmləri ilə birlikdə işləyəcək. Daha sonra isə generativ süni zəka sistemlərinə uyğunlaşdırılacaq. Meta rəhbərliyi süni zəka çiplərinin inkişafını qeyri-sabit proses kimi qiymətləndirir. Bununla belə, şirkətin "məntiq yürüdən süni zəka" üçün hazırladığı ilk nəsil çiplər uğurlu hesab edilir.